Þyrla Landhelgisgæslunnar, TF-LÍF, lenti á Akranesi skömmu fyrir hádegið í dag, mánudaginn 31. júlí. Ekki var um slys að ræða heldur voru gæslunnar menn að sækja björgunarsveitarmenn og búnað. Þyrlan lenti á bílastæðinu við húsnæði Björgunarfélags Akraness að Kalmannsvöllum. Gatan var lokuð fyrir umferð á meðan lendingu stóð. Nokkur fjöldi fólks safnaðist saman til að fylgjast með, enda ekki á hverjum degi sem þyrla lendir inni í bænum.

Þyrlan stoppaði þó stutt við í þessari heimsókn sinni á Akranes. Björgunarsveitarmenn stigu um borð með búnað og tæki og örstuttri stund síðar tók hún á loft á ný. Ferðinni var heitið á Heiðarhorn í Borgarfirði til að endurnýja VHF-endurvarpann sem þar er. Mun það tryggja viðbragðsaðilum góð fjarskipti um Faxaflóa, Hvalfjörð og langt inn á hálendið. Félagar úr Björgunarfélagi Akraness og Björgunnarsveitinni Brák fóru með þyrlunni að skipta um sendinn. Þyrlan hvarf síðan á braut og björgunarsveitarmenn munu ganga til byggða að vinnu lokinni þangað sem þeir verða sóttir.

: Tæki og búnaður ferjaður í þyrluna. Björgunarsveitarmenn stigu síðan sjálfir um borð og fóru með þyrlunni áleiðis á Skessuhorn í Borgarfirði.

TF-LÍF á ferð og flugi á Akranesi