Reykholtshátíð verður haldin í tuttugasta og annað sinn um helgina, dagana 28. til 30 júlí. „Dagskráin er sérlega glæsileg, fernir tónleikar sem bjóða upp á fjölbreytta flóru tónverka, flutt af mörgum af þekktustu tónlistarmönnum okkar og sérlegum gestum, finnska strengjakvartettinum Meta4. Efnisskráin spannar aldir – allt frá Bach (1685-1750) til hins finnska Juha Koskinen (1972),“ segir í tilkynningu.

„Opnunartónleikarnir verða á föstudagskvöld en þá mun kammerkórinn Schola Cantorum ásamt Kammersveit Reykholtshátíðar flytja verk eftir Arvo Pärt og Johann Sebastian Bach, m.a. hina þekktu Berlínarmessu Pärts og Brandenburgarkonsert Bachs. Laugardagurinn býður annars vegar upp á kammertónleika með Meta4 og hins vegar einsöngstónleika þegar tveir af þekktustu listamönnum okkar, Dísella Lárusdóttir og Nína Margrét Grímsdóttir, leiða okkur í ferðalag um Evrópu gegnum ljóðaflokka Strauss, Debussy, Manuel de Falla og Rachmaninoff. Hátíðinni lýkur með kammertónleikum allra hljóðfæraleikara hátíðarinnar sem koma fram í mismunandi hópum og bjóða upp á sannkallaða flugeldasýningu.“

Allir tónleikarnir fara fram í Reykholtskirkju og miðasala fer fram á midi.is. Hægt er að kaupa miða á staka tónleika eða hátíðarpassa sem gildir á alla tónleika hátiðarinnar. Einnig verður miðasala við innganginn. Nánari upplýsingar um efnisskrá og flytjendur er á reykholtshatid.is og á Fésbókarsíðu hátíðarinnar.

Finnski strengjakvartettinnn Meta4.

Falleg tónlist og töfrandi umhverfi á Reykholtshátíð