Um miðjan dag komu um fjögurhundruð skátar til Akraness og munu þeir dvelja á efri hluta tjaldsvæðisins í Kalmansvík fram á laugardag. Ástæða komu skátanna er sú að eitt stærsta skátamót heims, World Scout Moot, fer fram á Íslandi í þessari viku en það sækja 5.500 skátar frá öllum heimshornum á aldrinum 18-25 ára. Skagamenn eiga eflaust eftir að verða varir við skátana þar sem þétt dagskrá er fyrir þá á Akranesi. Má þar nefna kajakaferð við Langasand, göngu um bæinn og á Akrafjall, söguferð um bæinn, dagsferð í Borgarfjörð og margt fleira. Skátarnir greiða ekki fyrir dvöl sína á Akranesi í peningum heldur þurfa þeir allir að skila vinnu sem samsvarar hálfum vinnudegi. Vinnan snýr að fegrun Akraness, svo sem að slá og mála.

Spenna var í hópnum sem mætti til Akraness í dag en hópurinn sem dvelur á staðnum er mjög blandaður og þekktist lítið sem ekkert fyrir skátamótið. Dagurinn í dag fer því í að koma upp tjaldbúðum en hverjar búðir taka um 40 skáta. Þá fór hópurinn í alls kyns leiki til að þétta hópinn en formleg dagskrá hefst á morgun.

Fjögurhundruð skátar mættir á Akranes