2. október 2021
Víkingur AK kom til Vopnafjarðar á föstudagskvöldið með rétt tæplega 600 tonn af makríl sem fékkst á miðunum suðaustan við landið. Að sögn Hjalta Einarssonar á Víkingi hefur makríllinn veiðst jafnt fyrir austan sem vestan, en skip frá Vestmannaeyjum og tveir togarar höfðu m.a. verið að makrílveiðum í Grindavíkurdjúpi. „Við vorum að veiðum á Papagrunni, í Lónsdjúpi og Berufjarðaráli og fengum strax 170 tonn í fyrsta kasti. Síðan dró úr veiðinni og hlutfall síldar jókst í aflanum. Það er búin að vera kaldafýla á miðunum marga undanfarna daga og það hefur torveldað okkur leitina. Í morgun fengum við hins vegar 100 tonn af hreinum makríl,“ segir Hjalti á föstudaginn, en hann segir erfitt að átta sig á magni makríls við suðurströndina. Vera kann að það sé mikið, en makríllinn er þá mjög dreifður. „Það eina sem er ljóst, er að smærri makrílinn vantar í aflann. Meðalvigtin er áfram um eða yfir 400 grömm. Það er nóg af æti fyrir fiskinn og makríllinn sem við höfum verið að veiða er mjög vel haldinn,“ segir Hjalti í samtali við HB Granda vefinn.
