Í byrjun ágústmánaðar 2016 var tekin fyrsta skóflustungan að nýju Amtsbókasafni og skólabókasafni í Stykkishólmi. Framkvæmdir hófust skömmu síðar, en byggingin rís við hlið grunnskólans. Húsið er rúmir 500 fermetrar að stærð, teiknað af Arkitektastofunni OG. Það er Skipavík ehf. sem byggir og að sögn Sævars Harðarsonar, framkvæmdastjóra Skipavíkur, hefur verkið sóst vel. „Framkvæmdirnar ganga vel um þessar mundir og hafa reyndar gengið með eðlilegum hætti síðan þær hófust. Það er alltaf eitthvað sem kemur upp á, eins og gengur og gerist, en heilt yfir hefur gengið vel,“ segir Sævar í samtali við Skessuhorn. „Þessa dagana er verið að klára að glerja að utan og pússa að innan. Öll vinna við þau verk sem eftir á að gera er komin af stað. Undirverktakar eru komnir á svæðið í múrverkið, uppsetningu á loftræstikerfi og fleira í þeim dúr. Fáir starfsmenn frá okkur eru við bygginguna sem stendur,“ bætir hann við.

Sævar vill ekki kveða svo fast að orði að framkvæmdir séu á lokametrunum. „En það tekur allt enda og styttist óðum í að þetta klárist þó nokkuð sé eftir enn. Þó er ekki komin endanleg dagsetning á það hvenær við skilum verkinu af okkur,“ segir hann.

Nóg að gera

Sævar segir nóg við að vera hjá starfsmönnum Skipavíkur á öðrum vígstöðvum. „Fljótlega hefjast framkvæmdir við raðhúsalegju við Móholt hér í Stykkishólmi, beint á móti leikskólanum. Við eigum von á að hefjast handa þar með haustinu. Síðan er meiningin að byggja hús við Aðalgötu, húsnæði sem Skipavík kemur til með að eiga og leigja út undir atvinnustarfsemi,“ segir hann. Þá vinnur hluti starfsmanna fyrirtækisins um þessar mundir að að Dröngum á Skógarströnd, þar sem verið er að breyta íbúðarhúsi í gistirými. „Síðan er alltaf nóg að gera í slippnum og í járninu. Það er búið að vera mjög gott það sem af er sumri. Vonum bara að þau hausti ekki snemma, eins og kerlingin sagði,“ segir Sævar léttur í bragði að endingu.

Bygging Amtsbókasafns gengur vel