Darrell Flake í leik með Skallagrími síðasta vetur. Ljósm. Skallagrímur.
2. október 2021
Körfuknattleiksdeild Skallagríms hefur samið við reynsluboltann Darrell Flake um að spila áfram með liðinu á komandi keppnistímabili. Samhliða því að leika með liðinu verður Flake aðstoðarþjálfari, auk þess sem hann mun taka að sér þjálfun drengja- og unglingaflokks Skallagríms. Frá þessu er greint í tilkynningu á Facebook-síðu Skallagríms. Flake er körfuboltaáhugamönnum að góðu kunnur. Hann er 37 ára gamall og hefur leikið hér á landi við góðan orðstír frá árinu 2008, þegar hann gekk fyrst til liðs við Skallagrím. Aftur lék hann í Borgarnesi 2011 og 2012 og gekk síðan til liðs við Skallagrím þriðja sinni fyrir síðasta keppnistímabil. Síðasta vetur lék hann 24 mínútur að meðaltali í Domino‘s deildinni, skoraði 8,5 stig, tók 5,9 fráköst og gaf tvær stoðsendingar. „Ég er gríðarlega spenntur að fá Darrell aftur til liðsins, ekki síst þar sem hann kemur með mikilvæga reynslu í liðið, auk þess sem okkur vantaði tilfinnanlega meiri breidd í stöðurnar undir körfunni. Darrell mun hjálpa okkur að binda saman varnarleikinn auk þess sem allir vita hvað hann getur á hinum enda vallarins. Þá hef ég miklar væntingar um að hann verði góð viðbót við þjálfarateymið,“ segir Finnur Jónsson, þjálfari Skallagríms, á Facebook-síðu félagsins.
