Á hverju ári sendir Landssamband hestamannafélaga landslið til þátttöku á stórmóti, annarsvegar Norðurlandamót og hinsvegar Heimsmeistaramót íslenska hestsins. Farið er eftir sérstökum lykli við val á keppendum. Heimsmeistaramót íslenska hestsins í hestaíþróttum verður að þessu sinni haldið í Oirschot í Hollandi vikuna 7. – 13. ágúst, á sama stað og mótið var haldið fyrir tíu árum. Mótið er sem fyrr stærsti vettvangur íslenska hestsins á heimsvísu. Þar eiga nítján þjóðir keppnisrétt og má búast við miklum fjölda gesta þá sjö daga sem það stendur yfir. Fjölmenni hefur bókað ferð héðan frá landinu til að fylgjast með og njóta.

Borgnesingurinn Máni Hilmarsson hefur nú verið valinn sem knapi númer fimm í ungmennalið Íslands. Hann keppir á Presti frá Borgarnesi í fimmgangsgreinum en saman hafa þeir unnið til fjölda verðlauna, urðu m.a. Íslandsmeistarar í fimmgangi ungmenna á Íslandsmótinu í fyrra. Prestur er úr heimaræktun fjölskyldunnar í Borgarnesi, undan Klerki frá Bjarnanesi og Drottningu frá Þverholtum. Auk Mána eru nokkrir vestlenskir knapar og hross meðal þátttakenda. Má þar nefna Jakob Svavar Sigurðsson, Konráð Val Sveinsson og Björn Hauk Einarsson. Landslið Íslands í Hestaíþróttum verður formlega kynnt næstkomandi miðvikudag. Það er samkvæmt Facebook-síðu landsliðsins þannig skipað:

Jakob Svavar Sigurðsson og Gloría frá Skúfslæk T1 V1

Jóhann Rúnar Skúlason og Finnbogi frá Minni-Reykjum T1 V1

Ásmundur Ernir Snorrason og Spölur frá Njarðvík T1 V1

Þórarinn Eymundsson og Narri frá Vestri-Leirárgörðum F1 T1 pp1

Viðar Ingólfsson og Kjarkur frá Skriðu F1 T2 pp1

Svavar Örn Hreiðarsson og Hekla frá Akureyri P1 p2 pp1

Ævar Örn Guðjónsson og Vaka frá Sjávarborg p1 p2 pp1

Teitur Árnason og Tumi frá Borgarhóli p1 p2 pp1

Guðmundur Björgvinsson og Straumur frá Feti T1 V1

Reynir Örn Pálmason

Kristín Lárusdóttir og Óðinn von Hagenbuch T1 V1

Ungmenni

Finnbogi Bjarnason og Randalín frá Efri-Rauðalæk T1 V1

Gústaf Ásgeir Hinriksson og Pistill frá Litlu-Brekku T1 T2

Konráð Valur Sveinsson og Sleipnir frá Skör P1 P2 pp1

Anna Bryndís Zingsheim og Náttrún vom Forstwald T1 V1

Máni Hilmarsson og Prestur frá Borgarnesi.

Þau kynbótahross sem hafa verið valin eru.

Hryssur 5v – Buna frá Skrúð kn Björn Haukur Einarsson

Stóðhestar 5v – Grani frá Torfunesi kn Sigurður Matthíasson

Hryssur 6v – Hervör frá Hamarsey kn Vignir Jónasson

Stóðhestar 6v – Hængur frá Bergi kn Jakob Svavar Sigurðsson

Hryssur 7v og eldri – Hnit frá Koltursey kn Sigurður Vignir Matthíasson

Stóðhestar 7v og eldri – Þórálfur frá Prestbæ kn Þórarinn Eymundsson

Máni Hilmarsson valinn í landsliðið