Hvanneyrarhátíðin verður haldin á morgun, laugardaginn 8. júlí, frá klukkan 13:30 til 17. Þennan dag taka heimamenn vel á móti gestum og gangandi með fjölbreyttri dagskrá fyrir alla fjölskylduna. Upphaf hátíðarinnar má rekja til Safnadagsins sem Landbúnaðarsafn Íslands tók þátt í og bauð þá velunnurum sem og gömlum nemendum að koma á Hvanneyri og kíkja á safnið, sér að kostnaðarlausu, og hitta gamla félaga og vini. Nú hefur Safnadagurinn verði færður fram í maí og Hvanneyrarhátíðin stendur nú sem sérstakur viðburður sem hefur vaxið fiskur um hrygg undanfarin ár og fjöldi gesta margfaldast á milli ára.

Álfheiður Sverrisdóttir er í hópi þeirra sem undirbýr hátíðina á laugardaginn. „Meðal dagskráliða í ár eru heyvagnaakstur, opið fjós hjá Hvanneyrarbúinu, leiðsögn verður um Yndisgarða, sýning verður á íslenskum landnámshænum, markaður í gömlu íþróttahöllinni, leiðsögn um gömlu Hvanneyrartorfuna með Sveini Hallgrímssyni, húsdýr verða á staðnum og ýmsir leikir verða í boði fyrir börnin. Þá mun matsala verða á vegum Kvenfélagsins 19. júní, Skemmunnar kaffihúss og Hvanneyri pub og ef veður leyfir mun starfsfólk frá Ísbúðinni Valdísi kíkja í heimsókn með sinn gómsæta ís,“ segir Álfheiður.

Frír aðgangur verður að Landbúnaðarsafni Íslands á hátíðinni og ætla konurnar sem standa að Ullarselinu í sama húsi að leika þar listir sínar. „Einn af vinsælustu viðburðunum er innkoma Fornbílafjelags Borgarfjarðar sem stilla bifeiðum sínum upp ungnum sem öldnum til gamans ef veður leyfir.“ Loks mun Pétur Jónsson hagleiksmaður frumsýna endurgerðan Willys jeppa sinn, sem nánar er sagt frá í annarri frétt í blaðinu í dag.

Allar nánari upplýsingar um hátíðina og dagskrá má finna á Facebook síðunni Hvanneyrarhatid.

Fjölbreytt dagskrá í boði á Hvanneyrarhátíð