Umhverfis-, skipulags- og landbúnaðarnefnd Borgarbyggðar samþykkti á fundi sínum í gær fyrir sitt leyti tillögu að breytingu á aðalskipulagi Borgarbyggðar 2010-2022 sem snýr að skotæfingasvæði í landi Hamars. Breytingin á aðalskipulaginu felst í því að breyta landnotkun 16,7 hektara úr landbúnaði í íþróttasvæði þar sem skotæfingasvæðið er hugsað. Einnig þarf að skilgreina nýja reið- og gönguleið um 400 metra sunnan við svæðið auk þess sem nýr aðkomuvegur verður lagður að svæðinu frá Bjarnhólum sunnan efnistökusvæðis og mun samnýtt núverandi reið- og göngustíg.

Í bókun sem Björk Jóhannsdóttir gerði við afgreiðsluna kemur fram að hún leggst gegn tillögunni. Rökin sem hún nefnir eru svohljóðandi; „Ég leggst gegn þeirri breytingu á aðalskipulagi sem hér er gerð tillaga um. Fyrirhuguð staðsetning skotæfingasvæðis hefur ekki fengið faglega umfjöllun þar sem bornir eru saman ólíkir valkostir. Umrædd staðsetning er líkleg til að hafa áhrif á aðra aðila sem þegar hafa starfsemi á svæðinu og í grennd við það. Sé talið nauðsynlegt að breyta landnotkun á umræddum reit ætti frekar að gera hann að opnu svæði (sbr. grein 6.2 í skipulagsreglugerð nr. 90/2013), enda ljóst að svæðið hefur mikið gildi sem útivistarsvæði nú og til framtíðar.“

Mál skotæfingasvæðisins hefur verið á borði sveitarstjórnar og nefnda um nokkra hríð og hefur vissulega verið umdeilt. Ákveðið var að boða til íbúakosningar um skotsvæðið, en frá því horfið í vor. Andstaða hefur verið við málið m.a. frá umsjónarfólki fólkvangsins Einkunna. Málið fer senn að skýrast en eftir samþykkt umhverfis-, skipulags- og landbúnaðarnefndar fer málið nú fyrir sveitarstjórn sem væntanlega tekur endanlegan ákvörðun í því.

Gera tillögu um að aðalskipulagi verði breytt vegna skotæfingasvæðis