Laugardaginn 1. júlí var hjólreiðakeppnin Jökulmílan haldin á Snæfellsnesi. Samtals var um sex hjólaviðburði að ræða og voru tæplega 130 hjólreiðamenn skráðir til leiks, auk 20 keppenda í Mílusprettinum. Einmunablíða var á laugardaginn og nýttu því margir hjólarar lognið og meðvindinn til að bæta skráða tíma.

Í Íslandsmeistaramóti í flokki kvenna sigraði Erla Sigurlaug Sigurðardóttir mjög örugglega á tímanum 2:52:48, en konurnar hjóluðu 101 km. Í karlaflokki sigraði Anton Örn Elfarsson eftir æsispennandi endasprett við Óskar Ómarsson, Hafstein Ægi Geirsson og Bjarna Garðar Nicolaisson sem komu í mark í þessari röð, vart með sjónarmun. Karlarnir hjóluðu 161 km og var Anton Örn á tímanum 4:03:52 og bætti þar með fjögurra ára gamalt met í heilli Jökulmílu um tæpar 18 mínútur.

Íslandsmeistari ungmenna undir 23 ára aldri varð Heiðar Snær Rögnvaldsson, en hann hjólaði með körlunum 161 km. Í Junior-flokknum marði Sæmundur Guðmundsson Íslandsmeistaratitilinn eftir hressandi endaspretti við Kristinn Jónsson og Sólon Nóa Sindrason, en þeir hjóluðu hálfa Jökulmílu sem er 78 km frá Grundarfirði til Stykkishólms og til baka.

Þá fór fram almenningsviðburðurinn Jökulmílan sem var ekki hluti af Íslandsmeistaramótinu en jafnlöng. Í heilli Jökulmílu sigraði Eiríkur Þór Jónsson á tímanum 4:42:53 karlaflokkinn og kvennaflokkinn sigraði Eva Margrét Ævarsdóttir á tímanum 5:00:29. Í hálfri Jökulmílu sem er 78 km leið sigraði Davíð F. Albertsson á tímanum 2:10:35 og fyrst kvenna var Anna Guðrún Gunnlaugsdóttir á tímanum 2:21:49.

Loks voru 20 krakkar skráðir í Mílusprett, en þau hjóluðu einn eða tvo hringi um Grundarfjörð, allt eftir aldri, en yngsti keppandinn var fæddur 2011 og elsti 2004. Keppnisstjóra reyndist þrautin þyngri að fá suma þeirra til að hætta keppni. Það leystist þó þegar keppendur voru kallaðir í verðlaunaafhendingu þar sem þeir fengu medalíur, grillaðar pylsur og sleikjó í verðlaun.

„Hjólreiðafélagið Hjólamenn þakkar vegfarendum, heimamönnum og þátttakendum fyrir frábæran hjóladag. Öll úrslit eru birt á vefnum timataka.net.“

Alls tóku 150 þátt í Jökulmílu og tengdum keppnisgreinum