Bæjarhátíðin Írskir dagar verður haldin á Akranesi dagana 30. júní – 2. júlí. Með Írskum dögum er þess minnst að írskir menn, bræðurnir Þormóður og Ketill Bresasynir, námu fyrstir manna land við Akranes. Hátíðin hefur fyrir löngu skipað sér fastan sess í bæjarlífi Akurnesinga, enda er hún nú haldin í átjánda sinn. „Stærstu viðburðir hátíðarinnar verða flestir með hefðbundnu sniði, líkt og verið hefur undanfarin ár. Á föstudag verða hin árlegu götugrill og föstudagstónleikar og það verður óbreytt, með hefðbundnu sniði nema að því leytinu til að tónleikarnir verða haldnir á hafnarsvæðinu í ár, líkt og var gert fyrir tveimur árum,“ segir Ella María Gunnarsdóttir forstöðumaður menningar- og safnamála hjá Akraneskaupstað í samtali við Skessuhorn. Önnur föst atriði verða einnig áfram á dagskrá Írskra daga. „Skemmtun á Akratorgi á laugardeginum verður með hefðbundnu sniði, þar mun Sirkus Íslands vera með atriði, Björgvin Franz og Bíbí, strákarnir í BMX bros, rauðhærðasti Íslendingurinn verður krýndur og verðlaun veitt fyrir best skreytta húsið,“ segir Ella María og tekur fram að Akurnesingar muni að sjálfsögðu einnig koma fram á skemmtuninni.

Sandkastalakeppnin sem haldin er árlega á laugardeginum á Írskum dögum verður þó með breyttu sniði í ár. „Það verður flóð á hádegi þann dag, þannig að við þurftum að færa bæði staðsetninguna og tímasetninguna á keppninni. Hún byrjar klukkan 9:30 og verður í Langasandskrika við Sólmundarhöfða, sem er innsti hlutinn á Langasandi og næst dvalarheimilinu Höfða,“ útskýrir Ella María. Þá segir hún að á laugardeginum verði tveir kjarnar með skipulagðri dagskrá. „Annars vegar á Akratorgi og hins vegar við Byggðasafnið. Þar verður rakubrennsla, eldsmiðir að störfum og Hálandaleikar. Svo verða leiktæki út um allan bæ og tónleikar á ýmsum stöðum. Það verður því skemmtun og nóg um að vera fyrir alla aldurshópa alla helgina. Það má líka nefna að Leikhópurinn Lotta verður í Garðalundi á sunnudeginum í boði Norðuráls.“ Á laugardagskvöldinu verður árlegur brekkusöngur haldinn við þyrlupallinn og hið sívinsæla Lopapeysuball í framhaldi af því. Ella María segir undirbúning fyrir hátíðina hafa gengið vel. „Þetta er allt að smella. Það eina sem maður getur ekki slegið föstu er veðrið en mér finnst að við eigum inni að fá smá bongóblíðu þetta árið. En þegar maður býr á Íslandi, þá þarf maður stundum að ákveða hvort það er gaman eða ekki, maður getur eiginlega ekki látið veðrið stjórna því.“

Hér má sjá dagskrárauglýsingu Írskra daga.

Írskir dagar framundan