Í morgun var Bláfáninn 2017 dreginn að húni við Langasand á Akranesi. Þetta er fimmta árið í röð sem Langisandur fær viðurkenningu Bláfánans en hann er alþjóðlegt umhverfismerki sem hefur þann tilgang að stuðla að verndun umhverfis hafna og baðstranda. Bláfánann hljóta þeir einir sem leggja sig fram um að bæta gæði og þjónustu stranda og smábátahafna og stuðla að verndun umhverfis. Fáninn er tákn um að umhverfismál, öryggismál og umhverfisfræðslumál eru í hávegum höfð hjá handhöfum hans og er veittur þeim baðströndum sem uppfylla ákveðin skilyrði sem lúta að umhverfisfræðslu og upplýsingagjöf, vatnsgæðum, umhverfisstjórnun, öryggi og þjónusta.

Akraneskaupstaður hefur unnið undanfarin ár að því að uppfylla öll skilyrði sem sett eru. Grunn- og leikskólar bæjarins hafa unnið að fræðslu og verkefnum fyrir nemendur sem snúa að Landasandi m.a. með því að tína plastrusl af sandinum, vatnsgæði sjávar eru undir eftirliti með sýnatöku auk þess sem komið hefur verið upp upplýsingaskiltum við sandinn. Sindri Birgisson umhverfisstjóri Akraneskaupstaðar segir að bærinn sé heppinn að því leyti að lítið þurfi að hafa fyrir umhverfisvottun Langasands vegna þess hve hreinn og flottur Langisandur sé af náttúrunnar hendi.

Það voru leikskólabörn á Akranesi sem aðstoðuðu Sævar Frey Þráinsson, bæjarstjóra Akraness, við að draga fánann að húni. „Það er heiður að fá þessa vottun Bláfánans í fimmta skipti. Langisandur er náttúruperla sem þekkist vart í þéttbýli. Bláfáninn hvetur okkur áfram í að halda sandinum hreinum og bjóða upp á góða aðstöðu svo fólk nýti sér þessa frábæru náttúruperlu okkar Skagamanna,“ sagði Sævar Freyr í samtali við Skessuhorn.

Salome Hallfreðsdóttir , verkefnisstjóri Bláfánaverkefnis Landverndar, afhentir hér Sævari Frey Þráinssyni, bæjarstjóra Akraness, viðurkenningarskjal Bláfánans. Ljósm. bþb.

Bláfáninn dreginn í fimmta sinn að húni við Langasand