Í níundu umferð Pepsideildar karla mættust í Fossvogi Víkingur Reykjavík og Víkingur Ólafsvík í gær. Víkingur Reykjavík hefur verið á góðu skriði eftir að Logi Ólafsson tók við liðinu eftir að Milos hætti skyndilega sem þjálfari þess í upphafi sumars. Víkingur Ólafsvík hafa verið í brasi í sumar og sat á botni deildarinnar fyrir leikinn með sjö stig. Leiknum lauk með 2-0 sigri Reykjavíkur Víkings sem lyfti sér upp í fimmta sæti deildarinnar en skyldi Ólsara eftir í botnsætinu.

Í upphafi leiks lágu Ólsarar aftarlega á vellinum og voru þéttir en Reykvíkingar byrjuðu leikinn betur. Þegar leið á leikinn komust Ólsarar betur inn í leikinn og leikurinn jafnaðist. Fyrri hálfleikur var bragðdaufur og lítið um færi en bæði lið áttu þó eitt gott færi í hálfleiknum. Kwame Quee var sprækur fyrir Ólsara í leiknum og átti gott skot að marki Reykvíkinga á 35. mínútu sem Róbert Örn Óskarsson í marki Víkings Reykjavík varði vel. Reykvíkingar fengu svo besta færi hálfleiksins þremur mínútum síðar þegar besti leikmaður leiksins, Alex Freyr Hilmarsson, var nálægt því að koma boltanum í netið en Cristian Martinez varði glæsilega. Staðan jöfn í hálfleik, 0-0.

Reykvíkingar byrjuðu síðari hálfleik betur og skoruðu eftir aðeins fimm mínútna leik. Reykvíkingar fengu aukaspyrnu rétt fyrir utan teig og Alex Freyr Hilmarsson skaut föstu skoti neðarlega í markmannshornið; Martinez var í boltanum en hann lak í markið. Reykvíkingar bættu svo við öðru marki fimm mínútum fyrir leikslok. Ívar Örn Jónsson var snöggur að taka aukaspyrnu og senda boltann á Alex Freyr sem kláraði færið sitt einn á móti Martinez og bætti þar með sínu öðru marki. Ekki voru fleiri mörk skoruð en Ólsarar voru afskaplega nálægt því að minnka muninn í uppbótatíma en Reykvíkingar björguðu á línu eftir mikinn darraðardans í teignum.

Nú tekur við nokkuð langt frí hjá Ólsurum meðan keppt er í bikarkeppninni og Evrópudeildinni og eiga þeir næst leik í Hafnarfirði 7. júlí gegn Íslandsmeisturum FH.

Reykjavík sigraði víkingabardagann