Skagamenn hófu knattspyrnusumarið 2017 heldur illa og töpuðu fyrstu fjórum leikjunum. Þeir hafa þó verið að rétta úr kútnum að undanförnu og hafa nælt sér í átta stig í síðustu fimm leikjum. Um helgina lék ÍA í Garðabæ gegn Stjörnunni í níundu umferð Pepsideildar karla. Skagamenn nældu sér í mikilvægt stig í fallbaráttunni með 2-2 jafntefli.

Fyrsta hálftíma leiksins virtist aðeins eitt lið vera á vellinum. Stjörnumenn sóttu látlaust að marki Skagamanna sem virtust ekki eiga nein svör, hvorki sóknarlega né varnarlega. Stjörnumenn skoruðu fyrsta mark leiksins á 23. mínútu. Þá fékk Guðjón Baldvinsson boltann frá Jósef Kristni Jósefssyni vinstra megin í teig Skagamanna og skaut föstu skoti á nærstöng sem Ingvar Þór Kale í marki Skagamanna réði ekki við. Þegar hálftími var liðinn af leiknum ákvað Gunnlaugur Jónsson, þjálfari Skagamanna, að breyta um taktík liðsins. Hann fór þá úr 4-4-2 í 3-5-2 og við það lagaðist leikur Skagamanna töluvert. Stjarnan hélt þó áfram að vera betri aðilinn í fyrri hálfleik. Á 41. mínútu skoruðu Skagamenn mark þvert á gang leiksins. Hörður Árnason missti boltann á vallarhelmingi Skagamanna. Boltinn barst til Tryggva Hrafns Haraldssonar sem sá að Sveinn Sigurður í marki Stjörnunnar var illa staðsettur og of framarlega og skaut því boltanum framhjá Sveini í autt markið. Staðan 1-1 þegar flautað var til hálfleiks.

Skagamenn voru ferskir í byrjun síðari hálfleiks og áttu tvö fín færi. Það voru þó aðeins fjórar mínútur búnar af síðari hálfleik þegar Stjarnan fékk dæmda aukaspyrnu rétt fyrir utan teig Skagamanna. Hilmar Árni Halldórsson, líklega besti spyrnumaður deildarinnar, skoraði flott mark úr aukaspyrnunni og staðan orðin 2-1. Leikurinn róaðist og jafnræði var með liðunum lengst af síðari hálfleik. Skagamenn voru þó líklegri aðilinn þegar líða fór að lokum. Þegar fimm mínútur voru til leiksloka fengu Skagamenn aukaspyrnu á eigin vallarhelmingi. Þórður Þorsteinn Þórðarson tók spyrnuna og átti hann stórgóða sendingu inn í teig Stjörnunnar þar sem Arnar Már Guðjónsson skallaði boltann í netið og jafnaði þar með metin. Skagamenn voru svo nálægt því að stela sigrinum í lokinn þegar Tryggvi Hrafn gaf boltann inn í teig en Garðar Gunnlaugsson náði ekki til boltans á markteig. Fleiri mörk voru ekki skoruð og jafntefli staðreynd.

Skagamenn eru eftir leikinn enn í næstneðsta sæti með átta stig. Næsti leikur þeirra er í átta liða úrslitum bikarkeppninnar mánudaginn 3. júlí í Breiðholti gegn fyrstu deildar liði Leiknis.

Stigasöfnun Skagamanna heldur áfram