Fiskvinnslu- og söngkonan Jónína Björg Magnúsdóttir á Akranesi gaf nýverið út lagið Svei mér þá. Nína samdi sjálf lagið og textann, eftir að HB Grandi hf. tók ákvörðun um að loka botnfiskvinnslu fyrirtækisins á Akranesi og segja upp öllu starfsfólki þar. Textinn er hvöss ádeila á eigendur þessa tiltekna fyrirtækis. „Þetta er ekki bara ádeila á HB Granda, heldur á þá græðgi sem er í þjóðfélaginu almennt. Þó að þessum texta sé beint að mínum vinnuveitanda, þá virðist þetta alls staðar vera eins. Að það eigi að reka fyrirtæki eingöngu og algerlega upp á gróða virðist vera ríkjandi og ráðandi hugsun. Það er ekkert hugsað út í að gefa til samfélagsins, eins og var í gamla daga,“ sagði Nína í samtali við Skessuhorn. Lagið við textann er hefðbundið blúslag sem Nína tók upp í stúdíóinu Gott hljóð hjá Sissa í Borgarnesi. Nú hefur Nína látið gera myndband við lagið, þar sem sjá má gamlar ljósmyndir frá HB sem fengnar eru frá Ljósmyndasafni Akraness.

SVEI MÉR ÞÁ:

Ef landið ég ræki sem fyrirtæki

Þá kvóta ég setti á frekju og græðgi

Já svei mér þá, já svei mér þá

Því mikill vill meira en mestur hann vill bara fá.

Og Haraldur gamli í himninum grætur

En inni í neðra þeir borga sér „bætur“

Já svei mér þá, já svei mér þá

Því mikill vill meira en mestur hann vill bara fá.

Á fólkinu sérðu svo tár bæði og bauga

En hendurnar sínar „þeir“ hvítþvo og lauga

Já svei mér þá, já svei mér þá

Því mikill vill meira en mestur hann vill bara fá.

Á loftkenndum stjórnanda glott er í framan

Því hvalinn og hrognin hann selur til Japan

Já svei mér þá, já svei mér þá.

Því mikill vill meira og mestur hann vill bara fá.

Á Skipannaskaga hér gamanið kárnar

Og vinnandi fólki í hjartanu sárnar

Já svei mér þá, já svei mér þá

Því mikill vill meira en mestur hann vill bara fá.

Í bæinn þeir flýja með þorskinn og kvóta

Og skrifa í söguna vísuna ljóta

Já svei mér þá, já svei mér þá

Því mikill vill meira en mestur hann vill bara fá

Því mikill vill meira en mestur hann vill bara fá.

„Svei mér þá“ er hvöss ádeila á græðgina í þjóðfélaginu