Eins og fram kom í frétt Skessuhorns fyrr í vikunni hefur með dómi Héraðsdóms Reykjavíkur frá 16. júní verið felld úr gildi ákvörðun Skipulagsstofnunar frá 25. apríl 2014 þess efnis að fyrirhuguð framkvæmd Silicor Materials Inc., á Grundartanga skuli ekki háð mati á umhverfisáhrifum. Nú þarf Silicor því að fara í gegnum umhverfismat ætli fyrirtækið sér að reisa sólarkísilverksmiðju á Grundartanga. En það er óvissa um fleira en mat á umhverfisáhrifum, fjármögnun og raforkukaup. Fyrirtækið fer með augljósri seinkun framúr þeim lokafresti sem stjórn Faxaflóahafna veitti til að fyrirtækið hefji framkvæmdir. Málið er því á ákveðnum byrjunarreit. Davíð Stefánsson, talsmaður Silicor Materials hér á landi, segir að fyrirtæið telji sig hafa í einu og öllu fylgt lögum, reglum og leiðbeiningum eftirlitsstofnana. Dómurinn taldi hins vegar formgalla á þeirri ákvörðun Skipulagsstofnunar að heimila framkvæmdina án undangengins mats á umhverfisáhrifum og því verður að endurtaka málsmeðferðina. „Silicor telur enn að ekki þurfi að fara fram mat á umhverfisáhrifum vegna framkvæmdarinnar og jafnvel þótt slíkt mat færi fram, þá standist framkvæmdin alla skoðun í þeim efnum,“ segir Davíð Stefánsson.

Lokafrestur með skilyrðum

Við upphaf undirbúnings framkvæmda Silicor úthlutaði stjórn Faxaflóahafna 22 ha lóð undir starfsemina í landi Klafastaða, norðan við Grundartangahöfn og athafnasvæði Norðuráls. Gísli Gíslason hafnarstjóri Faxaflóahafna segir í samtali við Skessuhorn að þeir þrír samningar sem undirritaðir voru milli Faxaflóahafna og Silicor séu með þeim fyrirvara að þeir, eftir að hafa verið frestað þrívegis, taka ekki gildi fyrr en 15. september 2017, hafi Silicor ekki ákveðið að falla frá þeim fyrir þann tíma. Í bókun hafnarstjórnar frá 20. janúar síðastliðinn segir m.a.: „Stjórn Faxaflóahafna sf. getur fallist á að veita umbeðinn frest sem lokafrest, en með eftirfarandi skilyrðum: a) Haft verði samráð við Atvinnuvega- og nýsköpunarráðuneytið og fjármálaráðuneytið vegna fjárfestingarsamnings Silicor og ríkisins um frágang málsins þannig að frestunin rúmist innan ákvæða þess samnings. b) Á meðan unnið er að fjármögnun verkefnisins og þar sem samningar aðila hafa ekki tekið gildi verður ekki af hálfu Faxaflóahafna sf. farið í neinar framkvæmdir sem efni samninganna gera ráð fyrir. c) Silicor Materials skal halda fulltrúum Faxaflóahafna sf. upplýstum um gang viðræðna við fjárfesta og gera þeim grein fyrir því eins fljótt og kostur er hvort af verkefninu verði eða ekki innan þess tíma sem tilgreindur er í samþykkt þessari.“

Málið nánast á byrjunarreit

Gísli hafnarstjóri segir í samtali við Skessuhorn að miðað við yfirlýsingu Silicor um að fjármögnun muni dragast um a.m.k. eitt ár og að verið sé að skoða umfangsminna verkefni og í ljósi samþykktar hafnarstjórnar, eru ekki líkur á að fyrirliggjandi samningar milli aðila verði lagðir til grundvallar hugsanlegum framkvæmdum eftir eitt til tvö ár. „Silicor hefur enn ekki sent Faxaflóahöfnum formlega tilkynningu um stöðu málsins, en hefur boðað bréf um málið. Þegar það bréf berst verður farið yfir stöðuna,“ segir Gísli og bætir við: „Það er nokkuð augljóst að niðurstaða héraðsdóms um að fella úrskurð Skipulagsstofnunar úr gildi, yfirlýsing Silicor um tafir á fjármögnun og minnkun verkefnisins, stöðu raforkusamninga og fleira, leiðir til þess að það er nánast á byrjunarreit og ómögulegt að segja á þessari stundu til um hvort af því verði.“

Silicor nánast á byrjunarreit gagnvart lóð á Grundartanga