Hljómlistarfélag Borgarfjarðar var stofnað í Borgarnesi 1. júní síðastliðinn. Það voru fjórir Borgnesingar sem tóku sig saman og ákváðu að stofna félagið, þau Þóra Sif Svansdóttir, sem jafnframt er formaður félagsins, Halldór Hólm Kristjánsson, Daði Georgsson og Sigurþór Kristjánsson, best þekktur sem Sissi. Öll hafa þau unnið mikið í tónlist og fannst vanta félag sem gæti veitt tónlistarmönnum í Borgarfirði stuðning og stuðlað að samstöðu. „Við vinnum öll í tónlist og ákváðum að setja þetta félag saman, því okkur fannst vanta einhverja samstöðu hjá tónlistarmönnum hérna í héraðinu,“ segir Halldór Hólm í samtali við Skessuhorn. Halldór segir félagið vera fyrir allt tónlistarfólk á svæðinu og að allir geti gengið í það. Það sé þó fyrst og fremst hugsað fyrir flytjendur rythmískrar tónlistar, en ekki klassískrar. „Tónlistarfélag Borgarfjarðar heldur vel utan um þann hluta af tónlistarstarfinu. Við erum meira í dægurlögum og þess háttar tónlist.“

Ríða á vaðið í kvöld

Samhliða því að styðja við bakið á ungum og upprennandi tónlistarmönnum tekur félagið að sér að skipuleggja viðburði, líkt og það gerir á Brákarhátíð í Borgarnesi sem fram fer nú um helgina. Í kvöld munu tónlistarmenn frá félaginu halda tónleika í Þórðargötu, annað kvöld mun trúbador á vegum félagsins fara á milli svæða þegar götugrill verða haldin og á laugardag mun félagið standa fyrir skemmtun fyrir börn í Skallagrímsgarði. „Á laugardagskvöld verðum við svo með tónleika í Englendingavík í Borgarnesi. Við erum með þessu að virkja tónlistarfólk í Borgarnesi og héraðinu öllu. Á laugardaginn munu til dæmis sex söngvarar koma fram, allir úr héraðinu. Við viljum virkja tónlistarfólk, hér eru margir hæfileikaríkir. Við viljum efla samstöðu og gera eitthvað saman, gera eitthvað skemmtilegt,“ segir Halldór.

Hann bendir á að alltaf sé hægt að hafa samband við stjórn félagsins, annað hvort í gegnum netfangið hljomborg@gmail.com eða beint við þá sem eru í stjórninni. „Við erum öll með áratuga reynslu í tónlist og vitum upp á hár hvað við erum að gera.“ Halldór segir félagið þó fyrst og fremst vera styrktarfélag sem ætlað er að styðja við bakið á ungu tónlistarfólki. „Sem dæmi má nefna að ef einhver ungur tónlistarmaður ætlaði í upptökur, þá gætum við stigið inn í og hjálpað til með undirspil, fjármagn og svo framvegis. Við viljum styðja við okkar fólk.“

Nýstofnað Hljómlistarfélag Borgarfjarðar stendur fyrir viðburðum