Í gær lauk áttundu umferð Pepsideildar karla í knattspyrnu. Skagamenn mættu liði Fjölnis á Akranesvelli en leikurinn var gríðarlega mikilvægur því Skagamenn voru í næstneðsta sæti með fjögur stig og Fjölnir í níunda með átta stig. Leiknum lauk með hádramatískum sigri Skagamanna þar sem rautt spjald leit dagsins ljós og úrslitin réðust í uppbótartíma.

Fjölnir skoraði fyrsta mark leiksins á 38. mínútu eftir skot inni í teig í nærhornið. Skagamenn svöruðu markinu strax því fjórum mínútum síðar jafnaði Hafþór Pétursson metin. Þórður Þorsteinn Þórðarson tók aukaspyrnu sem fór að teigi Fjölnismanna og þaðan náði Arnór Snær Guðmundsson að koma boltanum á Hafþór sem skoraði með einkar skrautlegu skoti. Staðan 1-1 í hálfleik.

Í síðari hálfleik var spilaður opnari og skemmtilegri bolti. Þegar rúmar tíu mínútur voru liðnar af hálfleiknum komst Tryggvi Hrafn Haraldsson einn inn fyrir vörn Fjölnis. Mario Tadejevic varnarmaður gestanna reyndi hvað hann gat að ná honum en Tryggvi var sneggri. Mario ákvað þá að brjóta á Tryggva og fékk að launum rautt spjald enda brotið mjög ljótt og hann átti aldrei möguleika í boltann.

Skagamenn náðu illa að nýta sér það að vera einum fleiri og áfram hélt jafnræði með liðunum. Það var svo þegar tvær mínútur voru liðnar af uppbótartíma að eftir flott spil Skagamanna sendi Þórður Þorsteinn boltann inn í teig á Steinar Þorsteinsson sem renndi honum í netið. Fjölnir fékk svo hornspyrnu skömmu síðar þar sem Þórður Ingason, markmaður Fjölnis, fór inn í teig. Ingvar Þór Kale náði til boltans eftir hornspyrnuna og kastaði boltanum á Þórð Þorstein sem skaut af eigin vallarhelmingi í autt mark Fjölnis. Flautað var til leiksloka eftir markið og lauk leiknum því með 3-1 sigri. Skagamenn eru áfram í næstneðsta sæti eftir leikinn en nú með sjö stig. Næsti leikur ÍA er á laugardaginn í Garðabæ gegn Stjörnunni.

Skagamenn unnu mikilvægan sigur á Fjölni