Sjómannadagurinn verður haldinn hátíðlegur um land allt sunnudaginn 11. júní næstkomandi. Af því tilefni fara fram hátíðarhöld víðast hvar, þar á meðal í nokkrum byggðarlögum á Vesturlandi. Ýmislegt verður í boði yfir sjómannadagshelgina, þar á meðal í Grundarfirði, á Akranesi, í Stykkishólmi og Snæfellsbæ.

Í Grundarfirði standa hátíðarhöldin yfir alla sjómannadagshelgina og hefjast í dag á skotmóti milli sjómanna og landmanna. Golfmót verður í boði G.Run á föstudeginum og fyrir hádegi á laugardeginum verður sprell fyrir börnin í Vélsmiðju Grundarfjarðar. Þá verða hátíðahöld á bryggjunni sem enda á knattspyrnuleik á Grundarfjarðarvelli, þar sem sjómenn mæta sjómannskonum. Á sunnudeginum verður messa í Grundarfjarðarkirkju og kaffisala í Samkomuhúsi Grundarfjarðar, svo eitthvað sé nefnt.

Í Ólafsvík verður einnig dagskrá alla helgina. Hátíðahöldin hefjast á skemmtisiglingu á föstudeginum þar sem siglt verður á fjórum stórum bátum. Við tekur stanslaust fjör allt kvöldið og verða ungir listamenn í forgrunni á föstudagskvöldinu. Nóg verður um að vera á laugardag og sunnudag en þá verða hoppukastalar fyrir yngstu kynslóðina, Leikhópurinn Lotta mætir á svæðið, boðið verður upp á fiskisúpu hjá Fiskmarkaði Íslands á laugardeginum og kaffisala verður í húsnæði Lífsbjargar á vegum kvenfélagsins Sumargjafar á sunnudeginum, að ógleymdu hinu árlega sjómannahófi sem haldið verður á laugardagskvöldið. Þá verður messað í Ingjaldshólskirkju og Ólafsvíkurkirkju á Sjómannadaginn og verða auk þess uppákomur í sjómannagörðum í sveitarfélaginu.

Á Akranesi verður nóg um að vera á Sjómannadaginn. Frítt verður í sund í Jaðarsbakkalaug og í Akranesvita, Sjómannadagsmessa verður í Akraneskirkju þar sem sjómaður verður heiðraður og blómsveigur lagður að minnismerki sjómanna á Akratorgi að lokinni athöfn. Þá verður dýfingakeppni á vegum Sjóbaðsfélags Akraness við Aggapall á Langasandi, dorgveiðikeppni verður á Sementsbryggjunni og Björgunarfélag Akraness vígir nýtt björgunarsvip á hafnarsvæðinu. Boðið verður upp á fjölskylduskemmtun á hafnarsvæðinu, þar sem í boði verða róðrarkeppni, þrautir fyrir börn, kassaklifur og fleira. Þá er von á þyrlu Landhelgisgæslunnar í heimsókn ef aðstæður leyfa.

Einnig verður haldið upp á Sjómannadaginn í Stykkishólmi þar sem dagskráin verður með hefðbundnu sniði. Líf og fjör verður niðri á bryggju þar sem verður skemmtidagskrá og sitthvað að gera fyrir börnin. Það verður einnig sjómannadagsmessa í Stykkishólmskirkju þar sem sjómenn verða heiðraðir.

Fjölbreytt dagskrá um sjómannadagshelgina