Á Ólafsvíkurvelli í gær tók Víkingur á móti KA í sjöttu umferð Pepsideildar karla í knattspyrnu. KA-menn hafa verið nokkuð sprækir í deildinni og voru með átta stig fyrir leikinn en Víkingur í neðsta sæti með þrjú stig. KA átti leikinn á mánudaginn frá upphafi til enda og unnu hann örugglega 4-1.

Það tók ekki langan tíma fyrir KA að skora fyrsta mark leiksins en það kom á þriðju mínútu. Ásgeir Sigurgeirsson fékk sendingu inn fyrir vörn Víkings; Cristian Martinez Liberato í marki Víkinga kom langt út úr markinu og freistaði þess að komast í boltann á undan Ásgeir. Hann var þó aðeins of seinn og Ásgeir vippaði boltanum yfir hann á fjærstöngina þar sem Emil Sigvardsen Lyng var mættur og það eina sem hann þurfti að gera var að ýta boltanum yfir línuna. Emil bætti síðan við öðru marki á 21. mínútu. Langt innkast KA inn á teig endaði með góðum skalla Emils í mark Ólafsvíkur. Víkingur fékk flott færi undir lok fyrri hálfleiks til að minnka muninn. Kwame Quee fékk þá frábært færi fyrir opnu marki en skot hans var hrikalegt. Staðan 2-0 fyrir KA eftir fyrri hálfleik.

KA byrjaði síðari hálfleik nákvæmlega eins og þann fyrri því eftir þrjár mínútur skoruðu þeir sitt þriðja mark. Darko Bulatovic átti þá flotta fyrirgjöf inn í teig Ólafsvíkur þar sem Elfar Árni Aðalsteinsson komst í boltann og lagði hann snyrtilega í markið.

Bæði lið skoruðu svo undir lok leiks. Víkingur minnkaði muninn á 86. mínútu en þar var á ferðinni Gunnlaugur Hlynur Birgisson sem skoraði stórglæsilegt mark. Hann fékk boltann á u.þ.b. 30 metra færi og ákvað að negla að marki sem endaði með því að hann fór í slána og inn. Mínútu síðar fékk KA vítaspyrnu þegar Ignacio Heras Anglada gerðist brotlegur innan teigs. Emil fór á vítapunktinn og fullkomnaði þrennuna. Leiknum lauk því með 4-1 sigri KA.

Víkingur er enn í neðsta sæti deildarinnar eftir leikinn en KA lyfti sér upp í það fjórða. Nú tekur við landsleikjahlé í Pepsideildinni og því ekki leikið aftur fyrr en eftir viku en fimmtudaginn 15. júní fer Víkingur í Grafarvog og spilar gegn Fjölni.

Öruggur sigur KA á Víkingi Ólafsvík