Um liðna helgi var leikin sjötta umferð í Pepsideild karla í knattspyrnu. Á Akranesi lék ÍA við Breiðablik í gær. Leikurinn var hinn fjörugasti og mörg færi og mörk litu dagsins ljós. Það voru Blikar sem stóðu uppi sem sigurvegarar í leiknum með þremur mörkum gegn tveimur mörkum Skagamanna.

Skagamenn vilja væntanlega gleyma fyrstu tíu mínútum leiksins eins fljótt og hægt er. Á fimmtu mínútu leiksins sóttu Blikar upp vinstri vænginn þar sem kom fyrirgjöf inn í teig. Boltinn fór á Höskuld Gunnlaugsson sem renndi honum snyrtilega með hælnum á Gísla Eyjólfsson sem skoraði með hnitmiðuðu skoti. Aðeins þremur mínútum síðar skoruðu Blikar keimlíkt mark þegar þeir sóttu aftur upp vinstri vænginn þar sem Martin Lund Petersen gaf fyrirgjöf inn í teig þar sem Arnþór Ari Atlason lagði boltann í markið. Staðan orðin 2-0 eftir átta mínútna leik og vægast sagt hræðileg byrjun Skagamanna.

Eftir þessa byrjun fór um marga stuðningsmenn Skagans sem töldu að Blikar gætu farið upp í tveggja stafa tölu með þessu áframhaldi. Svo var ekki og Skagamenn lifnuðu við. Tryggvi Hrafn Haraldsson var mjög nálægt því að jafna metin á 12. mínútu leiksins en skot hans innan teigs hafnaði í stönginni. Liðin skiptust á færum í fyrri hálfleiks sem var hinn skemmtilegasti. Bæði lið voru nálægt því að bæta við marki undir lok fyrri hálfleiks. Fyrst Blikar þegar Hrvoje Tokic átti skalla í slá og svo Tryggvi Hrafn þegar komast í gott en þröngt færi einn gegn Gunnleifi en Gunnleifur varði frá honum. Staðan því 2-1 í hálfleik.

Skemmtanagildi síðari hálfleiks var engu minna en þess fyrri; liðin héldu áfram að skapa sér góð færi og mikið líf var í leiknum. Blikar skoruðu svo þriðja markið á 57. mínútu þegar Arnþór Ari skoraði sitt annað mark úr þröngu færi eftir darraðardans í teignum þar sem Skagamenn náðu ekki að hreinsa boltann. Skagamenn voru þó fljótir að svara fyrir sig en tveimur mínútum síðar lagði Arnar Már Guðjónsson boltann á Þórð Þorstein Þórðarson rétt fyrir utan teig. Þórður skaut afar fallegu skoti með vinstri í mark Blika.

Skagamenn reyndu allt hvað þeir gátu til að skora annað mark og það tókst á lokamínútu leiksins. Stefán Teitur Þórðarson átti þá hörkuskalla í stöng og út þar sem boltinn barst til Arnars Más sem lagði hann auðveldlega í markið. Markið kom of seint fyrir Skagamenn og skömmu síðar flautaði Gunnar Jarl dómari til leiksloka.

Skagamenn eru enn í basli í deildinni aðeins með þrjú stig í næstneðsta sæti en Blikar lyftu sér upp í sjötta sæti deildarinnar. Nú tekur við landsleikjahlé í Pepsideildinni og því ekki leikið aftur fyrr en eftir viku en miðvikudaginn 14. júní fara Skagamenn til Akureyrar og spila við KA.

Hræðileg byrjun varð Skagamönnum að falli