Silicor Materials hefur ákveðið að hægja á verkefnisþróunarvinnu vegna fyrirhugaðrar sólarkísilverksmiðju á Grundartanga. Tímaáætlun mun því breytast en vinna við verksmiðjuna gæti hafist á síðari hluta næsta árs,“ segir Davíð Stefánsson talsmaður Silicor Materials. Ástæður þessarar ákvörðunar eru nokkrar, að sögn Davíðs, en sú helsta eru tafir á fjármögnun annars áfanga verkefnisins. „Miklar kostnaðarhækkanir á Íslandi hafa einnig haft áhrif. Einvörðungu hluti þeirrar fjármögnunar sem búið var að tryggja, m.a. frá innlendum aðilum, hefur verið nýttur. Áfram verður unnið að framgangi verkefnisins á Íslandi og aðrar leiðir kannaðir til hlítar.“

Umhverfisvæn framleiðsla

Undanfarin misseri hefur Silicor Materials undirbúið byggingu sólarkísilvers á Grundartanga. Til stóð í upphafi að framkvæmdir gætu hafist á síðasta ári en ýmsir samverkandi þættir hafa tafið það. Sólarkísilverið á að byggja á framleiðsluferli sem fyrirtækið hefur þróað síðan 2006 og hefur einkaleyfi fyrir. Framleiða á sólarkísil með ódýrari og umhverfisvænni aðferð en þekkst hefur sem jafnframt útheimtir minni orku en hefðbundnar aðferðir. Sólarkísill er notaður í sólarhlöð til að virkja sólarorku sem aftur stuðlar að sjálfbærri þróun.

Endurskoða áætlanir

„Með því að hægja á undirbúningi verkefnisins er markmið Silicor Materials að skapa svigrúm til þess að endurskipuleggja starfsemi fyrirtækisins og áætlanir um uppbyggingu sólarkísilvers. Áfram verður unnið að framgangi verkefnisins á Íslandi, en fyrirtækið mun þó einnig skoða aðrar leiðir,“ segir Davíð. „Undanfarna mánuði hefur verið kannaður möguleiki á að byggja verkefnið upp í áföngum. Í ljósi þess að mikill vöxtur er í framleiðslu á sólarkísil og að framleiðsluaðferð Silicor Materials er fremri þeim sem nú eru ráðandi, þá er þörf fyrir verksmiðju sem þessa og að þessi tækni mun nýtast í umbreytingu yfir í umhverfisvæna orkugjafa. Ekkert í verkefninu er varðar fýsileika eða tækni hefur breyst. Þvert á móti hefur frekari framþróun á tækninni sýnt fram á meiri möguleika, betri nýtingu og gæði. Fyrir liggur að framleiðsluferlið er mjög verðmætt og m.a. hafa nýlegar prófanir hjá Fraunhofer stofnuninni í Þýskalandi sýnt fram á góða eiginleika afurðarinnar fyrir svokallaðar einkrystallaðar sólarsellur, en áður lá fyrir að efnið hentaði vel fyrir fjölkrystallaðar sólarsellur,“ segir Davíð Stefánsson.

Áfram þörf út frá umhverfissjónarmiðum

Terry Jester stjórnarformaður Silicor Materials segir að það liggi fyrir, eins og skýrt hefur komið fram í fjölmiðlaumræðu að undanförnu, að verulegt átak þarf til að sporna gegn hlýnun jarðar af mannavöldum og þeim alvarlegu afleiðingum sem þær geta haft á lífsskilyrði á jörðinni. „Með því að nýta orku sólar í auknum mæli til raforkuframleiðslu er hægt að vinna gegn hlýnun jarðar af mannavöldum. Fyrirhuguðu sólarkísilveri Silicor er ætlað að gera sólarorku að umhverfisvænni og ódýrari valkosti sem stuðlar að aukinni nýtingu hennar,“ segir Terry Jester.

Vonbrigði

Terry Jester segir jafnframt að það séu vonbrigði að Silicor Materials þurfi nú að hægja á undirbúningi verkefnisins og endurskoða útfærslur en aðstæður bjóða ekki upp á annað. „Ég er þakklát þeim fjölmörgu aðilum sem sem við höfum unnið með og stutt hafa vel við verkefnið og vonast til að við getum unnið með þeim áfram. Ísland er frábær staðsetning fyrir sólarkísilver þar sem til staðar er vel menntað starfsfólk, meginhráefni eru framleidd á landinu og sterk áhersla á sjálfbærni og grænar lausnir. Þá er fríverslunarsamningur við Kína einnig mjög jákvæður. Þrátt fyrir þessa töf erum við enn bjartsýn á að af byggingu verksmiðju á Íslandi geti orðið.“

Tafir á fjármögnun fresta byggingu sólarkísilverksmiðju á Grundartanga