Í gær hófst fjórða umferð fyrstu deildar kvenna í knattspyrnu með leik ÍA og Keflavíkur á Akranesvelli. Liðin voru jöfn að stigum fyrir leikinn með sex stig en búast mátti við hörkuleik þar sem líkur eru á að bæði lið verði í toppbaráttu deildarinnar.

Veðuraðstæður voru ekki góðar til knattspyrnuiðkunar á Akranesvelli í gær en hávaðarok var á vellinum auk þess sem það var mikil úrkoma á köflum í leiknum. Keflvíkingar spiluðu með vindi í fyrri hálfleik og komu inn fyrsta marki leiksins á 39. mínútu þegar Aníta Lind Daníelsdóttir kom boltanum í mark Skagakvenna. Fjórum mínútum síðar skoraði Bergdís Fanney Einarsdóttir fyrir Skagakonur og jafnaði þar með metin í 1-1 en þannig stóðu leikar þegar flautað var til hálfleiks.

Skagakonur voru betri aðilinn í upphafi síðari hálfleiks án þess þó að skapa sér mjög hættuleg færi. Á 60. mínútu nýtti Sveindís Jane Jónsdóttir sér einbeitingaleysi í vörn Skagakvenna og slapp ein inn fyrir. Hún lagði boltann svo snyrtilega framhjá Katrínu Maríu Óskarsdóttur í marki Skagakvenna og kom Keflavík þar með í forystu, 2-1, en þannig lauk leiknum. Framherjinn Sveindís Jane er ein efnilegasta knattspyrnukona landsins og var besti maður vallarins í gær þar sem hún var stöðugt ógnandi. Hún er aðeins 16 ára gömul en hefur nú þegar skorað 32 mörk í 28 leikjum í meistaraflokki.

Skagakonur eiga einnig margar efnilegar knattspyrnukonur og ein þeirra er Katrín María Óskarsdóttir sem spilaði sinn annan leik með meistaraflokki ÍA í gær. Það má til gamans geta að þessi ungi markmaður sem er sextán ára útskrifaðist úr Grundaskóla meðan á leik stóð en gat ekki verið viðstödd, eins og gefur að skilja, sökum leiksins.

Næsti leikur Skagakvenna er laugardaginn 10. júní á Akureyri gegn Hömrunum.

Skagakonur töpuðu gegn Keflavík