Heildarmat fasteigna á Íslandi hækkar um 13,8% frá yfirstandandi ári og verður 7.288 milljarðar króna, samkvæmt nýju fasteignamati fyrir árið 2018 sem Þjóðskrá Íslands hefur birt. Fasteignamatið hækkar á 98,3% eigna í landinu en lækkar á 1,7% eigna frá fyrra ári. Samanlagt mat um 130 þúsund íbúða á öllu landinu hækkar samtals um 15,5% frá árinu 2017 og verður alls 4.980 milljarðar króna. Á höfuðborgarsvæðinu hækkar matsverð íbúða í sérbýli meira en íbúða í fjölbýli. Á Vesturlandi hækkar fasteignamat um 14% en það er mesta hækkun utan höfuðborgarsvæðisins þar sem hækkunin er 14,5%. Af einstökum sveitarfélögum hækkar fasteignamat mest á Húsavík um 45%, í Kjósarhreppi um 41,3%, um 27,5% í Norðurþingi, um 25,9% í Reykhólahreppi og 25,2% í Skorradalshreppi. Á Akranesi er hækkunin 18,8%.

Fasteignamatið byggist á upplýsingum úr þinglýstum kaupsamningum auk fjölmargra annarra þátta sem hafa áhrif á verðmæti fasteigna. Nýja fasteignamatið miðast við verðlag fasteigna í febrúar 2017 og tekur gildi um næstu áramót og gildir fyrir næsta ár.

Nýjar matsaðferðir fyrir sumarbústaði

Heildarfasteignamat sumarbústaða og sumarbústaðalóða á landinu (19.372 fasteignir) hækkar úr 167 í 231 milljarð króna eða um 38,7%. Það eru 90,2% sumarbústaða sem hækka í mati en 9,8% lækka. Talsverður breytileiki á matsbreytingum er eftir svæðum. Algengasta hækkun er 39,7%. Þó svo að matsbreytingar séu miklar í prósentum þá eru 70% eigna að hækka um innan við 4 milljónir króna og 80% minna en um 6 milljónir kr. Staðsetning ræður miklu um verðmæti sumarbústaða. Þannig skiptir fjarlægð frá golfvöllum, háspennulínum og nálægð við vatn máli fyrir matið. Fyrir fasteignamatið voru mynduð ný markaðssvæði fyrir sumarhúsabyggðir. Í fasteignamatinu 2018 eru verðmætustu sumarhúsabyggðir landsins á Suðurlandi.

Fasteignamat hækkar á nánast öllu landinu