Flugsýning verður haldin á Reykjavíkurflugvelli klukkan 12 á morgun, laugardaginn 3. júní. Sýningin er í tilefni að 80 ára afmæli Flugmálafélags Íslands. Að þessu sinni mun F18 herþota taka þátt í sýningunni ásamt farþegaþotu, flugvélum, fornvélum, þyrlum, svifflugum, fisflugvélum, stærstu drónum landsins, þyrilvængjum, fallhlífarstökkvurum og svo mætti áfram telja. Sýningin er með stærsta móti að þessu sinni og lofar Matthías Sveinbjörnsson, forseti Flugmálafélagsins, í senn góðu veðri og flugveislu.

„Spáin er frábær. Það stefnir í sól og sumar. Við erum í daglegu sambandi við veðurfræðinga sem spá frábæru flugveðri. Það er því fátt sem hindrar það að sýningin verði sú flottasta í áraraðir,“ sgir Matthías. Hann segir að athyglisverðasta flugvélin á sýningunni sé hin kanadíska F18 herþota sem mun sýna flug yfir svæðinu og í kjölfarið lenda og verða til sýnis á sýningarsvæðinu. Mun þetta vera í fyrsta sinn í sögu flugsýninga á Reykjavíkurvelli að F18 þota taki þar virkan þátt. „Það er mikill heiður að fá heimsókn frá kanadíska flughernum sem verður með F18 þotu á svæðinu. Íslenskur flugunnendur geta í fyrsta sinn komist í návígi við þessa frægu flugvél og séð hana á jörðu og á flugi.”

Alls koma um 30 loftför og flugmenn að sýningunni. Að sögn Matthíasar verður sýningin með glæsilegsta móti þar sem um stórafmæli er að ræða bæði hjá Flugmálafélaginu og Icelandair sem einnig fagnar 80 ára afmæli og er helsti styrktaraðili sýningarinnar.

„Það hefur alltaf verið mikil mæting á flugsýningar og finnum við mikinn áhuga núna þegar sýningin er jafn glæsileg. Við erum flugþjóð og höfum því gaman að flugsýningum – við hlökkum því til þess að sjá sem flesta.”

Sýningarsvæðið er staðsett bakvið Hótel Natura við Reykjavíkurflugvöll og opnar kl 12 og stendur sýningin yfir til kl 15. Ókeypis er inn á svæðið og eru allir velkomnir.

Ein veglegasta flugsýning síðari tíma hér á landi