Á félagsfundi í Golfklúbbnum Leyni á Akranesi 29. maí síðastliðinn var kynnt fyrir félagsmönnum staða í húsnæðismálum og samningaviðræður við Akraneskaupstað um byggingu nýrrar 960 m2 frístundamiðstöðvar við Garðavöll. Ef hugmyndir þessar ganga eftir mun Akraneskaupstaður verða eigandi hússins en golfklúbburinn umsjónar- og rekstraraðili þess. Golfklúbburinn kostar hins vegar hönnun mannvirkja, umsjón með verkinu, niðurrif núverandi golfskála, þar sem fyrirhuguð staðsetning hins nýja húss er, og uppgröft á svæðinu. Fram hefur komið að grenndarkynna þarf bygginguna þar sem byggingin nær lítið út fyrir skilgreindan byggingarreit á skipulaginu. Áætlað er að heildarkostnaður við verkið verði um 300 milljónir króna.

Tillaga um frístundamiðstöð og hönnun er unnin af Halldóri Stefánssyni hjá Akri og fleiri. Hún tekur mið af gildandi skipulagi með lítilsháttar breytingum. Áætlað er að framkvæmdir gætu hafist eftir golfvertíðina næsta haust og verði lokið fyrir árslok 2018. Bygging hússins verður boðin út í sumar og samið við verktaka fyrir lok september. Tillaga er um hús sem geti nýst Golfklúbbnum Leyni, Akraneskaupstað og aðildarfélögum ÍA sem og einstaklingum og fyrirtækjum.

Hús sem uppfyllir nútíma kröfur

Gerð er tillaga um fjölnota hús sem yrði 961 fermetri að flatarmáli. Þar af verði 657 fm. jarðhæð auk 304 fm. kjallara. Í húsinu verður veitingasalur fyrir allt að 200 gesti, funda- og ráðstefnuaðstaða, inniaðstaða fyrir golfæfingar og stoðrými sem hentar starfsemi í húsinu. Í kynningu til félaga í golfklúbbnum Leyni kom m.a. fram að frístundamiðstöð muni komi til með að bæta mikið rekstur golfklúbbsins og efla starfið á ýmsan hátt. Fram hefur komið í fréttum Skessuhorns að núverandi félagsaðstaða uppfylli t.d. ekki lengur kröfur um gæði og stærð til að klúbburinn geti haldið stærstu mót á landsvísu. Frístundamiðstöðin muni því tvímælalaust bæta þjónustu við félagsmenn, gesti og aðra sem heimsækja Garðavöll. Haft er að leiðarljósi að þessi framkvæmd muni ekki gera almennan rekstur GL erfiðan eða hamla frekari endurnýjun vallar og tækjabúnaðs.

Samþykkt af hálfu Akraneskaupstaðar

Bæjarráð Akraneskaupstaðar samþykkti á fundi sínum 11. maí síðastliðinn breytingu á fjárfestingar- og framkvæmdaáætlun ársins vegna byggingar frístundamiðstöðvarinnar. Breyting á heildarfjárfestingaráætlun ársins á þessu ári nemur 116 milljónum vegna framkvæmdarinnar og sama upphæð áætluð á næsta ári og verður samkvæmt bókun bæjarráðs mætt með lækkun á handbæru fé bæjarsjóðs. Bæjarstjórn áætlar því að heildarkostnaður við framkvæmdina verði að hámarki 231 milljón króna að frádregnum virðisaukaskatti vegna byggingarkostnaðar en fyrirhugað er að sækja um heimild til skattyfirvalda um svonefnda sérstaka og frjálsa skráningu sem felur í sér að heimild til endurgreiðslu virðisaukaskatts vegna byggingarkostnaðar. Bæjarstjórn samþykkti á fundi sínum 23. maí að fela bæjarstjóra að vinna áfram að samningum um byggingu frístundamiðstöðvarinnar við Golfkúbbinn Leyni á fyrrgreindum forsendum. Ólafur Adolfsson formaður bæjarráðs segir í samtali við Skessuhorn að samningsdrög við golfklúbbinn miði við að kostnaður við framkvæmdina fari ekki yfir 286 milljónir króna með virðisaukaskatti.

Stefnt að byggingu frístundamiðstöðvar við Garðavöll á Akranesi