Í gær tóku Skagamenn á móti Gróttu á Akranesvelli í 16 liða úrslitum bikarkeppninnar í knattspyrnu karla. Ein deild skilur liðin að á Íslandsmótinu en Skagamenn spila í efstu deild og eru þar í næstneðsta sæti en Grótta er í níunda sæti fyrstu deildar. Það bjuggust því allir við auðveldum sigri Skagamanna þó ekkert sé gefið þegar bikarkeppni er annars vegar. Skagamenn höfðu að endingu betur eftir framlengdan leik, 2-1.

Töluverð rigning hafði verið á Akranesi fyrir leikinn og var völlurinn blautur og þungur þegar leikurinn var spilaður og setti það svip sinn á leikinn. Gróttumenn lágu aftarlega á vellinum og voru þéttir til baka allan tímann. Skagamenn áttu fá svör við leikjaplani Gróttu og sköpuðu sér fá færi þrátt fyrir að vera meira með boltann. Fyrri hálfleikur var bragðdaufur og ekkert mark skorað.

Á 63. mínútu fengu Gróttumenn aukaspyrnu hægra megin á vellinum, nokkuð frá vítateignum. Ingólfur Sigurðsson tók spyrnuna sem virðist hafa átt að vera fyrirgjöf en boltinn sveif lágt í gegnum allan vítateiginn þar sem enginn snerti hann og þaðan í markið. Grótta því komið í nokkuð óvænta 1-0 forystu. Það lifnaði nokkuð yfir leiknum eftir markið. Tíu mínútum eftir markið barst boltinn til Péturs Theódórs Árnasonar inn í teig Skagamanna þar sem Páll Gísli var hans eina hindrun en á einhvern óskiljanlegan hátt kom Pétur boltanum ekki á markið. Við þetta hresstust Skagamenn sem tóku öll völd á vellinum allt til leiks loka. Á 83. mínútu átti Þórður Þorsteinn Þórðarson hornspyrnu sem Arnar Már Guðjónsson skallaði að marki þar sem Tryggvi Hrafn Haraldsson komast í boltann og skallaði hann örugglega í markið.

Skagamenn lágu á Gróttumönnum í lok leiks en náðu ekki að skora. Það þurfti því að grípa til framlengingar. Á 95. mínútu framlengingar átti Arnar Már fínt skot að marki Gróttu sem Terrance William Dieterich markmaður Gróttu náði ekki að halda. Tryggvi Hrafn náði til boltans, fór framhjá Terrance og lagði boltann í autt markið. Staðan orðinn 2-1. Gróttumenn léku svo síðustu tíu mínúturnar í framlengingunni manni færri eftir að varamaðurinn Halldór Kristján Baldursson fékk sitt annað gula spjald eftir brot á Þórði Þorsteini Þórðarsyni. Ekki var meira skorað í leiknum og Skagamenn unnu því 2-1 sigur á Gróttu.

Með sigrinum komust Skagamenn í átta liða úrslit bikarkeppninnar í fyrsta skiptið í áratug en dregið verður í þær viðureignir síðar í vikunni.

Skagamenn í átta liða úrslit bikars í fyrsta sinn í áratug