Guðrún Ester Magnúsdóttir frá Fossi í Saurbæ er 100 ára í dag. Guðrún hefur undanfarið dvalið á heimili dóttur sinnar í Reykjavík en verður í þessari viku í hvíldarinnlögn á hjúkrunarheimilinu Mörk. Til stendur að halda upp á afmælið með ættingjum og vinum næstkomandi laugardag.

Guðrún Ester hefur alla tíð búið í Saurbæ og kveðst una sér best þar. Hún fæddist á Saurhóli 24. maí 1917. Foreldar hennar voru Magnús Árnason og Lára Lárusdóttir og var hún elst barna þeirra. Móðir hennar smitaðist af berklum og dó þegar Guðrún var fimm ára og kveðst hún lítið muna eftir henni. Ellefu ára flutti hún að Tjaldanesi í sömu sveit en 1937 fór hún að Fossi og hóf búskap með Hirti Guðjónssyni manni sínum. Á Fossi hefur Guðrún búið fram undir þetta, síðustu árin með Steingrími syni sínum. Í viðtali við Skessuhorn fyrir jólin 2011 kom m.a. fram að nægjusemi er aðalsmerki Guðrúnar á Fossi. Hún og fjölskyldan komst af með lítið.

Veikindi hafa sett strik í reikninginn hjá Guðrúnu undanfarið ár og þá hefur hún að auki dottið og meitt sig. Segist af þeim sökum hafa verið um tíma í Búðardal, á sjúkrahúsinu á Akranesi en auk þess á hjúkrunarheimilinu Mörk. Upp á síðkastið hefur hún svo búið hjá dóttur sinni á Njálsgötunni í Reykjavík. Guðrún og Hjörtur á Fossi eignuðust fimm börn og eru þrjú þeirra á lífi. Barnabörn hennar eru sjö, langömmubörnin 13 og langalangömmubörnin eru tíu. Hjört mann sinn missti Guðrún árið 1989.

Í stuttu spjalli við blaðamann Skessuhorns kveðst Guðrún vera sæmilega hress. „Ég heyri ekkert of vel en sé vel, fór í laseraðgerð á augum og fékk auk þess nýja augasteina og get lesið ef ég hef gleraugun.“ Guðrún segist hafa fótavist alla daga en sé orðin hálf löt. Hún kveðst hæfilega spennt fyrir að halda upp á þessi tímamót, en hlakkar þó til að hitta ættingjana þegar afmælinu verður fagnað á laugardaginn.

Guðrún á Fossi er hundrað ára í dag