Erfitt hefur reynst að ráða fólk í sumarafleysingar á Dvalarheimilið í Stykkishólmi. Að sögn Kristínar Sigríðar Hannesdóttur forstöðumanns vantar bæði fólk í aðhlynningu, félagsstarf og eldhúsið. „Það hefur ekki gengið nógu vel að manna fyrir sumarið. Staðan er verri en í fyrra en ástæðan er líka að það hafa verið afföll, vegna barneigna og svoleiðis. En það gekk betur í fyrra að manna þessar stöður,“ segir Kristín.

Hún segir stöðuna vera svona víðar en á dvalarheimilinu. „Maður heyrir þetta víðar en hér, það er enn verið að auglýsa eftir fólki víðast hvar í sumarafleysingar. Auðvitað má segja að það sé jákvætt að það sé ekki atvinnuleysi hérna í Stykkishólmi, þó staðan sé ekki jákvæð fyrir okkur hérna.“ Kristín segir að aðallega vanti starfsfólk í aðhlynningu, sérstaklega þegar líða fer á sumarið. „Frá og með miðjum júlí vantar mig alveg tvo til þrjá starfsmenn. Ef það gengur ekki, þá er reynt að reka þetta á aukavöktum sem gengur ekki til lengdar. Fólk verður þreytt og það er mun meiri kostnaður fólginn í því. Svo vantar í félagsstarfið, sem eru um þrír tímar á dag, fjóra daga vikunnar.“ Ef ekki fæst sumarafleysing við félagsstarfið mun starfið falla niður í þrjá mánuði í sumar. Til að bregðast við því ákvað starfsfólk dvalarheimilisins að leita til ættingja, vina og íbúa Stykkishólms á öllum aldri í gegnum Facebook. Þar er leitað til fólks sem er tilbúið að koma og lesa, spjalla, syngja, spila á hljóðfæri eða spila á spil, svo eitthvað sé nefnt. „Við höfum fengið einhver viðbrögð við auglýsingunni. Ásbyrgi mun koma eitthvað inn til okkar, eftir hádegi dag og dag. Svo var ein ömmustelpa sem ætlar að koma eitthvað til okkar í sumar líka,“ segir Kristín.

Hægt er að hafa samband við Kristínu á Dvalarheimilinu í síma 433-8165, bæði vegna sumarheimsókna og sumarafleysingastarfanna. „Þetta er ótrúlega skemmtilegur og lifandi vinnustaður,“ segir Kristín að endingu.

Félagsstarf fellur niður á Dvalarheimilinu í Stykkishólmi