Í gær mættust lið ÍA og nýliðar Grindavíkur á Akranesvelli í Pepsi deild karla. Báðum liðum var spáð slæmu gengi fyrir tímabilið og má því ætla að þau hafi litið á leikinn sem nokkuð mikilvægan. Skagamenn voru fyrir leikinn stigalausir en Grindvíkingar höfðu sigrað einn leik og gert jafntefli. Það voru Grindvíkingar sem stóðu uppi sem sigurvegarar, 3-2.

Nokkuð hvasst var á Akranesi þegar liðin mættust og setti það svip sinn á leikinn. Í fyrri hálfleik spiluðu Skagamenn með vindinn í bakið og Grindvíkingar í þeim síðari. Það dró til tíðinda snemma í leiknum. Á 14. mínútu slapp Andri Rúnar Bjarnason einn inn fyrir vörn Skagamanna og setti boltann snyrtilega framhjá ráðalausum Ingvari Þór Kale í marki Skagamanna. Skagamenn jöfnuðu svo metin á 28. mínútu þegar Steinar Þorsteinsson skoraði sitt fyrsta mark í efstu deild eftir snyrtilegan undirbúning Alberts Hafsteinssonar. Skagamenn fengu svo frábært tækifæri til þess að ganga til leikhlés með forystu á lokamínútu fyrri hálfleiks. Skagamenn fengu þá víti eftir að Jajalo í marki Grindavíkur var of seinn í boltann eftir fyrirgjöf og sló Garðar Gunnlaugsson í höfuðið. Garðar tók sjálfur vítið en Jajalo varði frá honum. Staðan 1-1 í hálfleik.

Áhorfendur höfðu vart áttað sig á því að síðari hálfleikur væri hafinn þegar Grindvíkingar komust í 2-1. Þá var aftur á ferðinni Andri Rúnar Bjarnason sem setti boltann í netið eftir undirbúning Arons Freys Róbertssonar. Skagamenn áttu margar góðar sóknir í leiknum og óheppnir að ná ekki að skora úr þeim. Það voru svo Grindvíkingar sem skoruðu næsta mark og breyttu stöðunni í 3-1 á 88. mínútu. Enn og aftur var það Andri Rúnar og fullkomnaði hann þar með þrennuna. Skagamenn voru ekki á eitt sáttir með aðstoðardómara leiksins og kröfðust þess að hann dæmdi rangstöðu á mark Andra. Skagamenn héldu áfram að berjast og náði Garðar Gunnlaugsson að koma inn marki á 90. mínútu en lengra komust Skagamenn ekki og lokatölur 3-2.

Grindvíkingar eru eftir leikinn í fjórða sæti með sjö stig en Skagamenn sitja á botninum án stiga. Brekkan fer að verða brött fyrir Skagamenn ef þeir fara ekki að ná í sín fyrstu stig á Íslandsmótinu. Næsti leikur Skagamanna er gegn ÍBV í Vestmannaeyjum næstkomandi laugardag, 27. maí.

Skagamenn töpuðu á heimavelli