Keppni í 1. deild kvenna í knattspyrnu hófst á föstudagskvöld þegar ÍA tók á móti Tindastóli. Leikurinn fór fram í Akraneshöll, en dómari leiksins taldi veður ekki vænlegt til knattspyrnuiðkunar og færði leikinn því undir þak.

ÍA var miklu betra liðið allan tímann og leikurinn fór að mestu leyti fram á vallarhelmingi gestanna. Skagakonur byrjuðu af krafti og komust yfir á 17. mínútu þegar Maren Leósdóttir skoraði með skoti af stuttu færi. Skagakonur óðu í færum í fyrri hálfleik og hefðu getað bætt nokkrum mörkum við. Það var hins vegar ekki fyrr en á 45. mínútu að þær bættu við öðru marki sínu. Þar var á ferðinni Heiðrún Sara Guðmundsdóttir sem var mætt á fjærstöngina og skoraði auðveldlega eftir góða sendingu frá hægri.

Skagakonur réðu áfram ferðinni eftir hléið og þjörmuðu enn að gestunum. Þær komust í 3-0 á 63. mínútu þegar Maren skoraði sitt annað mark með laglegu skoti frá vítateigsjaðrinum. Maren innsiglaði síðan þrennu sína á 75. mínútu. Markmaður Tindastóls varði skot frá hægri beint út í teiginn þar sem Maren beið og átti ekki í vandræðum með að leggja boltann í opið markið. Tveimur mínútum síðar skoraði Bryndís Rún Þórólfsdóttir skoraði fimmta mark ÍA. Laglegt spil upp vinstri kantinn endaði með fyrirgjöf á Bryndísi sem skaut í stöng. Boltinn féll hins vegar fyrir fætur hennar aftur og hún lagði hann auðveldlega í netið.

Síðasta mark leiksins kom síðan á 81. mínútu. Heiðrún tók á móti góðri fyrirgjöf frá hægri, lagði boltann fyrir markið á Erlu Karitas Jóhannesdóttur sem skoraði í opið markið og kom ÍA í 6-0 í sínum fyrsta leik í Íslandsmótinu.

Fleiri mörk voru ekki skoruð í leiknum og verðskuldaður sigur ÍA staðreynd. Liðið er á toppi 1. deildar eftir stórsigur í fyrsta leiknum. Næst leika Skagakonur föstudaginn 19. maí næstkomandi þegar þær mæta ÍR á útivelli.

: Heiðrún Sara Guðmundsdóttir er komin aftur eftir barneignafrí og átti góðan leik á móti Tindastóli. Ljósm. gbh.

: Erla Karitas Jóhannesdóttir skoraði sitt fyrsta mark fyrir ÍA í Íslandsmótinu og innsiglaði með því 6-0 stórsigur ÍA.

Skagakonur hófu mótið með látum