Umhverfisstofnun leggst gegn fyrirhugaðri uppbyggingu vegna starfsemi á og við Langjökul. Ferðaþjónustufyrirtækið Into the Glacier, sem á og rekur ísgöngin í Langjökli, vill reisa 300 fermetra skemmu, 150 fermetra móttökuhús og koma fyrir tveimur 20 feta gámum sem nýttir verða fyrir starfsmannaaðstöðu ofarlega í Húsafellslandi. Fyrirtækið áætlar að nýta 13 hektara landsvæði úr landi Húsafells fyrir aðstöðu fyrir tæki og tól. Þá er áætlað að skilgreina 1,5 hektara nánar fyrir starfsemi Into the Glacier. Áætlað er að taka á móti ferðamönnum sem koma á svæðið með hópferða- eða einkabílum og því er gert ráð fyrir bílastæðum fyrir sex til tíu rútur og milli 30 og 40 einkabíla. Einnig þarf stæði fyrir trukkana sem ferja fólkið upp á jökulinn.

Við mörk friðlýsts svæðis

Þetta kemur fram í umsögn UST um tillögu á breytingu á aðalskipulagi Borgarbyggðar. Svæðið er í núgildandi skipulagi skilgreint sem frístundabyggð en verður breytt í þjónustusvæði nái breytingartillögurnar fram að ganga. Svæðið sem um ræðir er umlukið kjarri til suðurs og austurs og liggur við mörk friðlýsts náttúruverndarsvæðis Húsafellsskógar. Segir í umsögninni að verndargildi svæðisins felist í allvíðáttumiklum birkiskógi sem sé vinsælt útivistarsvæði. Fjarlægð frá sjó annars vegar og nágrenni við lindir og ár geri Húsafellsskóg að sérstæðu svæði.

Mikilvægt að kanna aðra valkosti

„Að mati Umhverfisstofnunar virðist áætluð uppbygging á skemmu og bílastæðum ásamt gámum ekki falla vel að nánasta umhverfi þess svæðis sem fjallað er um í lýsingunni. Þannig verða hlið við hlið annars vegar fíngerður birkiskógur sem er hverfisverndaður og friðlýstur og hins vegar áætlað þjónustusvæði með farartækjum og viðhaldstækjum sem mögulega fylgir mengunarhætta,“ segir í umsögn UST. Þá bendir stofnunin á að áætluð uppbygging svæðisins muni skyggja á útsýni þeirra sem fara þar um, bæði til suðurs og austurs. Telur stofnunin þjónustusvæði sem þetta frekar eiga heima nær byggð þar sem svipaðar byggingar sé að finna, sé þess nokkur kostur.

Telur stofnunin að að mikilvægt sé að meta áhrif á gróður og náttúru- og menningjarminjar þegar breytingatillagan verður unnin. Einnig verði metin ásýndaráhrif og sjónræn áhrif svo mikilla framkvæmda á ósnortnu svæði og athuga vel hvort mengunarhætta sé mögulega fyrir hendi. Mikilvægt sé að kanna aðra valkosti um staðsetningu fyrirhugaðrar uppbyggingar í væntanlegu skipulagi.

UST leggst gegn þjónustusvæði vegna ísgangafyritækis