Aðalfundur Verkalýðsfélags Akraness var haldinn síðdegis í gær, sama dag og 86 félagsmenn fengu boð um væntanlegar uppsagnir starfa í fiskvinnslu HB Granda á Akranesi. Eðli málsins samkvæmt var stemningin á fundinum því í samræmi við það. Af þeim sökum féll í skuggann að ástæða er fyrir verkalýðsfélagið að gleðjast þar sem fjárhagsleg og félagsleg staða þess er sterk um þessar mundir. Í skýrslu stjórnar kom fram að rekstrarafgangur er af öllum sjóðum félagsins og nam hann 109 milljónum króna. Fram kom að félagsmenn munu njóta þess með ýmsum hætti í formi hækkunar á styrkjum og öðru er lýtur að réttindum félagsmanna. Fæðingarstyrkur verður hækkaður úr 85 í 100 þúsund krónur og ef báðir foreldrarnir eru í félaginu nemur heildarupphæðin 200 þúsund krónum. Einnig var gleraugnastyrkur hækkaður úr 40 í 45 þúsund krónur.

„Á fundinum kom fram að réttindabarátta félagsins og varðveisla réttinda félagsmanna hefur verið gríðarlega mikil á liðnum misserum og kom fram í máli formanns að félagið rekur nú þrjú mál fyrir dómstólum og hefur innheimt yfir 400 milljónir króna vegna hinna ýmsu kjarasamningsbrota sem átt hafa sér stað frá því að ný stjórn tók við í nóvember 2003,“ segir í tilkynningu um fundinn. Þá voru málefni líðandi stundar ofarlega í huga fundarmanna á aðalfundinum. Einkum sú ákvörðun forsvarsmanna HB Granda að hætta landvinnslu á Akranesi eftir yfir 100 ára vinnslu á sjávarafurðum. Fram kom í máli Vilhjálms Birgissonar formanns að árið 2002 hafi 170.000 tonnum verið landað á Akranesi, 350 manns hafi starfað hjá Haraldi Böðvarssyni og fyrirtækið verið langstærsti launagreiðandi á Norðvesturlandi með greiðslur sem námu tveimur milljörðum króna. „Núna væri þetta allt að fara og var það mat fundarmanna að það væri ekki hægt að láta slíkt átölulaust og því var áskorun til félagsins um að fordæma þessi vinnubrögð harðlega enda liggur fyrir að þær forsendur sem HB Granda menn gefa sér virðast ekki standast eina einustu skoðun,“ segir Vilhjálmur.

Skorað á Alþingi

„Aðalfundur Verkalýðsfélags Akraness haldinn 11. maí 2017 fordæmir ákvörðun HB Granda um að ætla sér að hætta landvinnslu á Akranesi og færa störfin suður til Reykjavíkur enda er það mat fundarins að forsvarsmenn fyrirtækisins hafi ekki sýnt fram á þá hagræðingu sem slíkar aðgerðir eiga að leiða af sér. Aðalfundurinn skorar á Alþingi Íslendinga að byggðafesta aflaheimildir og standa vörð um dreifða byggð í landinu og tryggja atvinnu eins og kveðið er á um í 1. grein um stjórn fiskveiða. Fundurinn telur það nöturlegt þegar aðilar sem hafa tímabundinn umráðarétt yfir auðlindum hafsins geta tekið ákvörðun um að svipta fólk lífsviðurværi sínu og skilja samfélögin eftir í sárum. Því ítrekar fundurinn áskorun til Alþingis um að tekið verði á þessari meinsemd við stjórnun fiskveiða,“ segir í ályktun aðalfundar VLFA í gær.

Aðalfundur VLFA haldinn í skugga uppsagna