Eldur kom upp í sinu í mólendi skammt sunnan við Dal í Eyja- og Miklaholtshreppi um nónbil í dag. Eldurinn náði að breiðast hratt út enda töluverður vindur á svæðinu og jörð þurr. Um tíma var óttast um mannvirki á Vegamótum og gróðrarstöðinni á Lágafelli. Að sögn tíðindamanns Skessuhorns á svæðinu hefur nú tekist að einangra eldinn þannig að hann nái ekki að húsum á svæðinu. Í slökkvistarfinu tekur stór hópur þátt. Kom mannskapur og tæki frá Slökkviliðinu í Stykkishólmi og Borgarbyggð auk þess sem Slökkvilið Grundarfjarðar er á leiðinni á vettvang [Uppfært; komnir á svæðið uppúr kl. 17]. Þá eru bændur með dráttarvélar og haugsugur og aka með vatn til sprauta á eldinn. Mikill mannskapur er auk þess á svæðinu enda svæðið stórt.

Klöppur eru notaðar til að berja niður eldinn og þá aka bændur um á dráttarvélum með vatn í haugsugum. Ljósm. sá.

Hér má sjá reykinn, vestan við veginn áleiðis á Vatnaleið, séð frá Hjarðarfelli. Ljósm. Sigurbjörg Ottesen.

Slökkvistarf í gangi stutt frá Vegamótum. Ljósm. sá.

Barist er við sinueld í Eyja- og Miklaholtshreppi