Á morgun, laugardaginn 6. maí, fer fram Norræni strandhreinsunardagurinn á Snæfellsnesi. Að honum standa Landvernd og nokkur umhverfisverndarsamtök á Norðurlöndum auk annarra skipuleggjenda á Íslandi sem eru Svæðisgarðurinn Snæfellsnes, EarthCheck Snæfellsnesi, Lionshreyfingin á Íslandi og Blái herinn. Snæfellsnes varð fyrir valinu því þar hefur lengi verið hugað að umhverfismálum, sveitarfélögin fimm eru öll með EarthCheck vottun og Stykkishólmur hefur verið leiðandi afl í plastpokalausum samfélögum. Nemendur Lýsuhólsskóla hafa þvívegis verið valdir Varðliðar umhverfisins og því hægt að segja að gott starf sé unnið í umhverfismálum á Snæfellsnesi. Hreinsaðar verða þrjár strendur á Snæfellsnesi og fer samtímis fram strandhreinsun á öllum Norðurlöndunum. Auk fjölda sjálfboðaliða mun Umhverfis- og auðlindaráðherra Björt Ólafsdóttir taka þátt í Strandhreinsun á Snæfellsnesi.

Dagskrá á Malarrifi allan daginn

Gestastofan á Malarrifi verður opnðu kl. 11:00. Þar mun landvörður mæta ásamt sögumanni sem mun halda fólki við efnið yfir daginn. Ætlunin er að gefa yngstu kynslóðinni kost á að taka til hendinni líkt og þeim fullorðnu, rétt norðan við Gestastofuna. Á svæðinu eru ýmis leiktæki. Skoðaðir verða munir sem finnast og sögumaður mun segja fá þeim og ýmsum rekahlutum. Salthúsið verður skoðað en þar er sýning sem krakkarnir í Grunnskólanum á Lýsuhóli settu upp en þau voru nýlega valin Varðliðar umhverfisins af umhverfisráðuneytinu, Náttúruskóla Reykjavíkur og Skólum á grænni grein. Einnig eru þar litir og pappír til brúks. Gengið verður að vitanum sem er rétt um 100 metra frá gestastofunni.

Lokahóf í Breiðabliki

Opið verður í félagsheimilinu Breiðabliki allan daginn en lokahóf fer fram á milli kl 16 og 18. Formleg dagskrá hefst kl. 17. Að loknum vel heppnuðum strandhreinsunardegi verður boðið í fiskisúpu og skemmtiatriði. Kári Viðarsson í Frystiklefanum fer með gamanmál. Björt Ólafsdóttir umhverfis- og auðlindaráðherra mun taka þátt í strandhreinsuninni ásamt fjölskyldu sinni.

Árlega notar hver Íslendingur að meðaltali 40 kíló af plastumbúðum á ári. Þá eru ekki með talnir hlutir úr plasti sem notaðir eru eins og leikföng, raftæki, húsgögn leirtau og fleira. Alls eru þetta um 13.000 tonn árlega. Sem jafngildir 13000 yaris bifreiðum, eða 13000 fílum!

Af þessum 13000 tonnum skila sér aðeins 3360 tonn í endurvinnslu (þar með taldar allar endurgjaldsskyldar drykkjarumbúðir) eða rúmlega 10 kg/íbúa. Það þýðir að rúmlega 29 kg af plastumbúðum eru urðaðar á ári. Urðun merkir að ruslinu er þjappað saman í bagga og hann grafinn í jörðu. Þar heldur svo plastið að vera til um ókomna tíð enda brotnar það aðeins niður í smærri einingar, örplast en eyðist ekki.

Ströndin á Snæfellsnesi hreinsuð á morgun