Um fimmtíu bátar af ýmsum stærðum eru nú að veiðum á Breiðafirði, á þriðja degi strandveiðitímabilsins. Tæplega 400 bátar hafa nú virkjan strandveiðileyfi sín þegar öll veiðisvæði eru talin. Alfons Finnsson fréttaritari Skessuhorns er í þeim hópi en hann rær á bátnum Sæfinni HF frá Ólafsvík. Fonsi var nú á tíunda tímanum í morgun staddur um fjórar mílur norðaustur af Ólafsvík. Sagði hann að það væri skítabræla á miðunum og erfitt að athafna sig. „Það er fiskur hérna, það vantar ekki, en það er mikið rek og færið eins og þvottasnúra. Því er spáð að lægi heldur þegar líður á daginn og maður verður bara að bíða þolinmóður eftir því,“ segir Alfons.

Strandveiðibátar frá Ólafsvík hafa lítið getað sótt sjóinn fyrstu tvo daga tímabilsins, en þó hafa þeir sem hafa róið fengið reiting og nokkrir náð að fylla dagsskammtinn sem er 650 kíló. Verð fyrir aflann hefur verið fremur lágt, en í gær var meðalverðið á markaði um 170 krónur fyrir slægðan þorsk.

Börkur Árnason rær á Ás SH. Hér er hann á miðunum í morgun. Símamynd: af.

Mikið rek og færið eins og þvottasnúrur