Alþýðusambandi Íslands hafa borist tilkynningar um 1. maí hátíðarhöld í meira en 30 sveitarfélögum á landinu. Á Vesturlandi verður komið saman á öllum helstu þéttbýlisstöðum í tilefni dagsins. Lesendur geta kynnt sér dagskrána í auglýsingum í síðasta Skessuhorni. Í samantekt ASÍ er dagskráin þessi:

Akranes

Safnast verður saman við Kirkjubraut 40, kl. 14:00 og genginn verður hringur á Neðri-Skaga. Undirleik í göngu annast Skólahljómsveit Akraness. Að göngu lokinni verður hátíðardagskrá í sal Verkalýðsfélags Akraness á 3ju hæð Kirkjubrautar 40. Fundarstjóri verður Vilhjálmur Birgisson, en ræðumaður dagsins Ólafur Arnarson. Kvennakórinn Ymur syngur nokkur lög og kaffiveitingar verða í boði. Frítt er í bíó fyrir börnin í Bíóhöllinni kl. 15:00.

Borgarnes

Hátíðar- og baráttufundur hefst í Hjálmakletti kl. 11.00. Hátíðin sett: Signý Jóhannesdóttir formaður Stéttarfélags Vesturlands, en ræðu dagsins flytur Arna Jakobína Björnsdóttir formaður Kjalar stéttarfélags í almannaþjónustu. Boðið verður upp í dans, tvö pör sýna dans og atriði verður frá Grunnskólanum í Borgarnesi. Egill Ólafsson Stuðmaður með meiru tekur lagið og Internasjónalinn verður sunginn. Félögin bjóða samkomugestum í súpu og brauð að fundi loknum. Kvikmyndasýning fyrir börn verður í Óðali kl. 13:30, boðið verður upp á popp og ávaxtasafa.

Stykkishólmur

Kynnir verður Dallilja Inga Steinarsdóttir en ræðumaður: Dröfn Haraldsdóttir, sérfræðingur í félagsmáladeild ASÍ. Sigga Eyrún og Kalli Olgeirs koma fram, sem og Stórsveit Snæfellinga. Kaffiveitingar verða í boði.

Grundarfjörður

Kynnir: Helga Hafsteinsdóttir en ræðumaður dagsins er Dröfn Haraldsdóttir, sérfræðingur í félagsmáladeild ASÍ. Sigga Eyrún og Kalli Olgeirs koma fram og Stórsveit Snæfellinga spilar. Kaffiveitingar verða í boði.

Snæfellsbær

Kynnir: Guðmunda Wíum en ræðumaður verður Dröfn Haraldsdóttir, sérfræðingur í félagsmáladeild ASÍ. Sigga Eyrún og Kalli Olgeirs koma fram og Stórsveit Snæfellinga spilar. Kaffiveitingarí boði og sýning eldri borgara verður sem og bíósýning.

Búðardalur

Dagskrá í Dalabúð kl. 14:30. Kynnir: Kristín G. Ólafsdóttir, stjórnarmaður SDS. Ræðumaður: Eiríkur Þór Theódórsson varaformaður ASÍ-Ung og stjórnarmaður í Stétt Vest. Skemmtiatriði: Stórsöngvarinn- og leikarinn, Egill Ólafsson. Kaffiveitingar að lokinni dagskrá.

Hátíðarhöldin víða um land á baráttudegi verkalýðsins