Háskólinn á Bifröst verður með opinn dag í háskólaþorpinu laugardaginn 29. apríl, milli klukkan 14 og 17. Á opna deginum verður sem fyrr námsframboð háskólans kynnt og nemendur bjóða gestum í gönguferðir um svæðið og skólann. Einnig verður skemmtidagskrá fyrir alla fjölskylduna.

Við Háskólann á Bifröst er í boði framsækið nám í viðskipta,- laga- og félagsvísindadeild sem miðar að því að undirbúa nemendur sem best undir atvinnulífið með hagnýtum verkefnum og hópavinnu. Í grunnnámi við viðskiptadeild Háskólans á Bifröst er t.a.m. í boði viðskiptafræði með áherslu á ferðaþjónustu og viðskiptafræði með áherslu á markaðssamskipti. Frá og með hausti verður í boði nýtt meistaranám við deildina, annars vegar í forystu og stjórnun með áherslu á mannauðsstjórnun og hins vegar í markaðsfræði. Háskólinn á Bifröst var fyrsti íslenski háskólinn til að bjóða nemendum BS í viðskiptalögfræði og frá vorönn 2017 hefur einnig verið í boði MBL, meistaranám í viðskiptalögfræði. Við félagsvísindadeild háskólans er í boði BA í heimspeki- hagfræði og stjórnmálafræði (HHS) og BA í miðlun og almannatengslum og meistaranám í menningarstjórnun. Þá er Háskólagátt fyrir þá sem vilja ljúka aðfaranámi í háskóla og er góður undirbúningur fyrir háskólanám.

Á Opnum degi verður einnig glæsileg skemmtidagskrá í boði fyrir alla fjölskylduna. Alda Dís og Eiríkur Hafdal halda tvenna tónleika í Hriflu klukkan 14:30 og 16:15. Þá verður Leikhópurinn Lotta með sýningu fyrir yngstu kynslóðina kl. 15 og andlitsmálning verður í boði. Árlegt vöfflukaffi verður einnig á sínum stað í hátíðarsal skólans á vegum Kvenfélags Stafholtstungna.

Loks má benda á að umsóknarfrestur í meistaranám er til 15. maí næstkomandi og í grunnnám til 15. júní.

Háskóladagur á Bifröst á morgun