„Mér líst bara vel á sumarið og við hlökkum til að mótið byrji. Vonandi verður bara gott veður í sumar, segir Ejub Purisevic, þjálfari karlaliðs Víkings Ó, léttur í bragði í samtali við Skessuhorn. Víkingur hefur leik í Pepsi deild karla í knattspyrnu sunnudaginn 30. apríl næstkomandi þegar liðið heimsækir Val á Hlíðarenda. Undirbúningur er á lokametrunum og Ejub kveðst ánægður með hópinn. „Ég er ánægður með liðið, hópurinn er alltaf að styrkjast og verður betri og betri. Breytingar hafa orðið frá síðasta ári, eins og gengur og gerist en ég held að það sé ekkert óeðlilegt fyrir lið frá litlum bæ eins og Ólafsvík,“ segir hann. „Hins vegar er ég alltaf að leita að góðum leikmönnum og dyr okkar eru opnar fyrir góðum leikmönnum sem vilja koma og spila í Ólafsvík,“ bætir hann við. Því má við þetta bæta að eftir að viðtalið var tekið við Ejub hafa tveir spænskir leikmenn bæst við leikmannahópinn í Ólafsvík og hefja þeir leik á sunnudaginn.

„Getum skapað framtíð“

Aðspurður um markmið sumarsins vonast Ejub til að geta gert betur en síðast. „Helst viljum við gera betur en í fyrra og gaman væri að geta komið á óvart í deildinni. En mestu máli skiptir að hafa gaman af þessu,“ segir hann. Víkingur hafnaði í 10. sæti í deildinni á síðasta ári. Liðið byrjaði mótið af miklum krafti en fór að halla undan fæti á miðju sumri. Víkingur náði ekki sigri í síðustu 13 leikjum sumarsins en tókst að bjarga sér frá falli. „Ef markmiðið næst þá skiptir ekki máli hvar í mótinu maður vinnur leikina og fær stigin,“ segir Ejub og telur engar líkur á að slæmt gengi í síðari umferðinni í fyrra hafi áhrif á liðið nú. „Þetta er gleymt frá því í fyrra. Nú er nýtt mót og nýr leikur í hvert skipti. Ég hugsa bara um einn leik í einu. Leikir vinnast og leikir tapast, við förum yfir málin og svo er það búið. Við breytum ekki fortíðinni en við getum skapað framtíð,“ segir hann.

Geta gert vel

Lið Ejubs eru þekkt fyrir að byggja á þéttum og skipulögðum varnarleik, en síðan er reynt að draga fram styrkleika leikmanna í sókninni. Aðspurður telur hann að engin breyting verði á því í sumar. „Áætlun okkar er að byggja á sterkri vörn. Bæði mér og Víkingi hefur gengið vel með þessu fyrirkomulagi. Ég held raunar að flest lið í heiminum fyrir utan Barcelona og Real Madrid reyni að byggja að stærstu leyti á góðum varnarleik,“ segir hann. „Við byggjum á því sem við höfum gert undanfarin ár og sjáum hvaða árangri það skilar okkur. Við erum með góða leikmenn og leikmannahópurinn getur gert vel í sumar,“ segir Ejub. „En fyrst og fremst vona ég að við getum notið sumarsins. Þetta er þriðja tímabilið okkar á síðustu fimm árum í úrvalsdeild, það er ótrúlega gaman og við erum ánægð með það. Mér finnst frábært þegar Pepsi deildin kemur í Ólafsvík. Það er miklu betra að horfa á Pepsideildarleiki í Ólafsvík en annars staðar,“ segir Ejub léttur í bragði. „Ég vona að allir hlakki til hér í Ólafsvík eins og við og bæjarbúar vilji njóta sumarsins með okkur. Ég hef trú á að við getum gert þetta vel og vona að fólk verði duglegt að styðja sitt lið eins og áður,“ segir Ejub Purisevic að lokum.

„Frábært þegar Pepsi deildin kemur í Ólafsvík“