Í tilefni af 150 ára verslunarafmæli Borgarness verður haldinn hátíðarsamkoma í Hjálmakletti laugardaginn 29. apríl þar sem íbúum sveitarfélagsins verður boðið til samsætis. Guðni Th. Jóhannesson forseti Íslands verður heiðursgestur samkomunnar. Einnig verða opnaðar sýningar í Íþróttamiðstöðinni í Borgarnesi og ljósmyndasýningin Tíminn gegnum linsuna enduropnuð í Safnahúsi Borgarfjarðar þar sem saga Borgarness í nær 100 ár er rakin í gegnum linsu fjögurra Borgnesinga.

Á afmælisdaginn, 22. mars síðastliðinn, var sveitarstjórn Borgarbyggðar með hátíðarfund í Kaupangi sem er elsta hús bæjarins. Í tilefni dagsins var tekin skóflustunga að viðbyggingu við Grunnskóla Borgarness.

Forseta Íslands afhent fyrsta eintakið

Í tilefni afmælisins hefur Saga Borgarness verið rituð. Egill Ólafsson, blaðamaður og sagnfræðingur hóf ritun verksins í ársbyrjun 2014. Við andlát Egils í ársbyrjun 2015 var Heiðar Lind Hansson sagnfræðingur ráðinn til að taka við verkinu og ljúka því. Saga Borgarness er tveggja binda verk „Byggðin við Brákarpoll“ og „Bærinn við brúna“. Sagan telur nær 1000 blaðsíður með á sjötta hundrað mynda. Sagan er rituð í læsilegum og léttum frásagnarstíl þar sem komið er inn á flest það sem hæst hefur borið í 150 ára sögu samfélagsins. Nefna má sem dæmi atvinnumál, sveitarstjórnarmál, menningarmál, verslun og viðskipti, skólamál, íþróttir, samgöngur, vaxtarskeið og varnarbaráttu og þannig mætti áfram telja. Saga Borgarness verður formlega gefin út á afmælishátíðinni í Hjálmakletti og Forseta Íslands afhent fyrsta eintakið. Fram að þeim tíma er hún seld í forsölu.

Hátíðarsamkoman er öllum opin og hefst hún klukkan 15.00 í Hjálmakletti.

Afmælishátíð í Borgarnesi á morgun