Félag um foreldrajafnrétti og Börnin okkar standa að ráðstefnunni Leyfi til að elska – um foreldraútilokun og afleiðingar hennar fyrir börn og foreldra. Ráðstefnan fer fram í Háskólabíói í Reykjavík á alþjóðlegum degi vitundarvakningar um foreldraútilokun, þriðjudaginn 25. apríl klukkan 13:00-16:30.

„Foreldraútilokun, meðvituð eða ómeðvituð, er ákveðið mynstur sem felur í sér ferli og afleiðingu þess þegar viðhorfum barns er stjórnað með neikvæðri innrætingu, ótta, óvirðingu og/eða óvild í garð annars foreldris eða fjölskyldumeðlima. Tálmanir á umgengni eru einungis ein birtingarmynd foreldraútilokunar. Þessar aðstæður setja barnið í tryggðarklemmu sem getur orðið til þess að það neitar samvistum við það foreldri sem útilokunin beinist gegn.

Rannsóknir sýna að í 10-15% skilnaða þar sem börn koma við sögu eigi einhvers konar foreldraútilokun sér stað. Hún hefur alvarleg áhrif á heilbrigði og velferð barns og flokkast undir andlegt ofbeldi. Börn í þessum aðstæðum búa við skert lífsgæði og oft alvarlega stöðu vanlíðunar og sorgar vegna deilna foreldra um umgengni og/eða forsjá og vegna tengslarofs við annað foreldri. Þessar aðstæður skaða barnið – oft til langs tíma.

Fjöldi sérfræðinga, innlendra og erlendra flytja erindi á ráðstefnunni. Meðal þeirra eru Dr. Edward Kruk, dósent í félagsráðgjöf við University of British Columbia og Dr. Jennifer Jill Harman, dósent í sálfræði við Colorado State University í Bandaríkjunum, en þau eru meðal helstu sérfræðinga á heimsvísu í málefnum foreldraútilokunar. Ráðherrar þeirra ráðuneyta sem málefnið fellur undir, Sigríður Á. Andersen, dómsmálaráðherra, og Þorsteinn Víglundsson, félagsmálaráðherra, flytja erindi og fundarstjóri er Guðmundur Steingrímsson, fyrrverandi alþingismaður.“

Nánar um ráðstefnuna á Facebook-síðunni “Leyfi til að elska” https://www.facebook.com/events/1801867143466212/.

Leyfi til að elska – ráðstefna um foreldraútilokun