Magnús Oddsson, fyrrum bæjarstjóri á Akranesi og rafveitustjóri rafveitu Akraness, lést í gær, þriðjudaginn 11. apríl.

Magnús fæddist 17. nóvember 1935 og var tæknifræðingur að mennt. Hann flutti á Akranes frá Reykjavík árið 1968 til að taka við starfi rafveitustjóra Rafveitu Akraness. Gegndi hann því starfi þar til haustið 1974, en var þá ráðinn bæjarstjóri. Hann var bæjarstjóri á Akranesi til haustsins 1982, en lét þá af störfum og tók aftur við starfi rafveitustjóra og gegndi því til ársins 1995. Við sameiningu orkufyrirtækja í ársbyrjun 1996 tók hann við starfi veitustjóra Akranesveitu og gegndi því til ársins 2000. Á sama tíma var Magnús framkvæmdastjóri Hitaveitu Akraness og Borgarfjarðar og Andakílsvirkjunar. Þá var hann einnig stjórnarmaður í Lífeyrissjóði Akraneskaupstaðar.

Sem bæjarstjóri og rafveitustjóri leiddi Magnús og kom að mörgum framfaramálum fyrir Akranesbæ. Má þar nefna uppbyggingu rafveitunnar, byggingu íþróttahússins við Vesturgötu, stofnun og uppbyggingu Fjölbrautaskóla Vesturlands, fyrsta áfanga Grundaskóla, uppbyggingu Akraneshafnar og fyrsta áfanga dvalar- og hjúkrunarheimilisins Höfða. Hann kom að stofnun Hitaveitu Akraness og Borgarfjarðar og síðar að rekstri veitunnar sem framkvæmdastjóri. Sömuleiðis kom hann að fyrstu skrefum í uppbyggingu á Grundartanga, átaki í gatnagerð með nýlagningu gatna og lagningu bundins slitlags á eldri götur bæjarins. Enn fremur var hann veitustjóri Akranesveitu á sínum tíma og gegndi jafnframt framkvæmdastjórastöðu HAB og Andakílsvirkjunar á miklum umbrotatímum í orkumálum á starfssvæðinu.

Magnús var virkur í starfi íþróttahreyfingarinnar, bæði á Akranesi og á landsvísu. Hann sat í stjórn Íþróttabandalags Akraness frá 1983 til 1992, þar af sem formaður frá 1984 og var meðal annarra í forystu um byggingu íþróttahúss að Jaðarsbökkum. Hann var varaforseti Íþróttasambands Íslands frá 1992 til 1997 og heiðursfélagi bæði ÍA og ÍSÍ.

Eftirlifandi eiginkona Magnúsar er Svandís Pétursdóttir, fyrrum sérkennari á Akranesi. Sonur þeirra er Pétur Magnússon, forstjóri Hrafnistu.

„Akraneskaupstaður þakkar Magnúsi Oddssyni fyrir ómetanlegt starf í þágu Akraneskaupstaðar og íþrótta á Akranesi og sendir eiginkonu og syni og öðrum aðstandendum innilegar samúðarkveðjur. Að virðingu við minningu Magnúsar Oddssonar er flaggað í hálfa stöng við bæjarskrifstofur Akraness í dag,“ segir í tilkynningu á vef Akraneskaupstaðar.

Andlát: Magnús Oddsson