Íslandsmeistaramótið í 50 metra laug fór fram í Laugardalslaug dagana 7.-9. apríl. Sundfélag Akraness átti sína fulltrúa á mótinu og sneri einn þeirra heim sem Íslandsmeistari, því Ágúst Júlíusson sigraði í 100 m flugsundi á tímanum 55,96 sek. Bætti hann þar með Akranesmet sitt frá árinu 2012.

Einnig tóku sundkappar af Akranesi með sér þrjú silfurverðlaun og eitt brons. „Spennan í lauginni og keppnin á milli sundmanna um sæti var gífurleg en það var aðeins að muna hársbreidd á milli efstu sætanna,“ segir í tilkynningu frá Sundfélagi Akraness.

Ágúst hreppti silfrið í 50 m flugsundi þar sem hann synti á 24,94 og bætti þar með eigið Akranesmet frá 2015. Var hann aðeins 0,11 sekúndum á eftir fyrsta sætinu.

Sævar Berg Sigurðsson vann tvö silfur, annað í mjög spennandi 100 m bringusundi þar sem hann bætti sig um 1,90 sec og synti á tímanum 1.08.08 sek. Var hann aðeins aðeins 0,30 frá gullinu. Hitt silfrið hreppti hann í 50 m bringusundi þar sem hann synti á 31,25 sek. og var aðeins 0,09 sek á eftir sigurvegaranum. „Sævar bætti sig um 0,8 sek. sem er mjög góð bæting í svona stuttu sundi,“ segir í tilkynningunni. Að lokum hlaut Sævar bronsverðlaun í 200 metra bringusundi.

Bandaðar sveitir sundfélagsins settu tvö Akranesmet á mótinu. Sveit félagsins Í 4×50 m fjórsund synti á 1,58.75 sem er bæting um 2,4 sek. á fyrra meti frá 2015. Þá bætti sveit félagsins í 4×50 m skriðsundi met frá 2015 um 1,7 sekúndur og synti á 1,48.21 sek.

Allir bættu sig

Brynhildur Traustadóttir hafnaði í 4. sæti í 200 m skriðsundi, 5. sæti í 100 m skriðsundi og 6. sæti í 50 m flugsundi og 100 m flugsundi og 7. sæti í 400 m skriðsundi. Una Lára Lárusdóttir hafnaði í 6. sæti í 50 m skriðsundi og 8. sæti í 200 m baksundi. Erlend Magnússon varð 6. í 50 m og 100 m baksundi og Ásgerður Jing Laufeyjardóttir varð í 7. sæti í 100 m skriðsundi og 8. sæti í 200 m bringusundi.

„Sundkrakkarnir áttu frábæra helgi og var þetta okkar besta íslandsmót í 50 m laug í mörg ár. Samtals syntu þau núna 16 úrslitasund á móti 9 í fyrra. Sérstaklega var gaman að sjá þau yngstu ná sínum fyrstu úrslitum og sjá að stelpurnar bættu sig úr tveimur úrslitasundum í fyrra, í níu úrslitasund núna. Allir átta sundmennirnir okkar bættu sig um helgina og það samtals í 32 sundum. Óhætt að segja að framtíðin sé björt hjá Sundfélagi Akraness,“ segir í tilkynningu sundfélagsins.

Syntu vel á Íslandsmeistaramótinu