Lögð hefur verið fram áætlun á Landspítalanum sem ætlað er að taka á fráflæðisvanda spítalans. Verður hafist handa við fyrstu skref áætlunarinnar nú um miðjan aprílmánuð. Morgunblaðið greinir frá. Læknar hafa þrýst á yfirstjórn Landspítala að gera eitthvað í fráflæðisvandanum, en mikikils óróleika hefur gætt meðal starfsfólks þar vegna álags og áhyggja af öryggi sjúklinga. Svo langt hefur málið gengið að rætt hefur verið um að lýsa yfir neyðarástandi.

Einn liður áætlunar til að taka á flæðivanda Landspítala er aukið samstarf við Heilbrigðisstofnun Vesturlands. Bið- og endurhæfingardeild með 15 rúmum verður opnuð í maímánuði og þegar eru komin sex rými á HVE á Akranesi og í Borgarnesi sem sjúklingar fara strax í, að sögn Guðlaugar Rakelar Guðjónsdóttur, framkvæmdastjóra flæðisviðs Landspítala.

Þak á fjölda á bráðadeild

Fyrsta skref áætlunarinnar er hins vegar að setja þak á fjölda sjúklinga sem bíða innlagnar á bráðadeild Landspítala. Stefnt er að því að þeir verði aldrei fleiri en tólf og fari fækkandi eftir því sem önnur skref áætlunarinnar komast í framkvæmd. Slíkt þak hefur ekki verið hingað til og allt að 30 manns hafa legið á bráðadeild í hvert skipti, en þar er aðeins pláss fyrir um 30 manns. Í samtali við Morgunblaðið segir Jón Magnús Kristjánsson, yfirlæknir bráðalækninga á Landspítala, að 18 sjúklingar liggi að meðaltali sem eru að bíða eftir innlögn á deildina. Það þýðir að aðeins eru 12 pláss eftir til að sinna bráðaþjónustunni og hvorki sé pláss né tími til að sinna nýjum sjúklingum. Þá hafi bráðalæknar þurft að fylgjast með og sinna þessum innlögðu sjúklingum. „Það sem samsavarar heilli legudeild hefur bæst við ábyrgð starfsfólks bráðadeildarinnar, án þess að það hafi bæst við mannskapur. Undir þeim kringumstæðum finnst bráðalæknum þeir ekki getað tryggt öryggi sjúklinganna né treysta þeir sér til að vinna við þær aðstæður og þetta vinnuálag áfram,“ segir Jón Magnús. Því var þrýst fast á yfirstjórn að grípa til aðgerða.

Greiningardeild verður opnuð á Landspítalanum 1. júní, en upphaflega átti ekki að opna deildina fyrr en í september. Mun hún taka við stórum hluta innlagðra sjúklinga frá bráðamóttökunni. Þar verður lagt mat á sjúklingana og sett af stað meðferðar- og rannsóknarferli sem miðar að því að stytta legutíma. Þegar starfsemi greiningardeildarinnar verður komin í gagnið er stefnt að því að sjúklingar bíði eigi lengur en sex klukkustundir á bráðamóttöku Landspítala eftir innlögn, en meðal biðtími sjúklinga í dag er um 18 klukkustundir.

Forsvarsmenn Heilbrigðisstofnunar Vesturlands eru á fundum í dag og af þeim sökum náðist ekki í þá við vinnslu fréttarinnar.

Bið- og endurhæfingardeild opnuð á Akranesi í maí