Lokahátíðum Stóru upplestrarkeppninnar er nú lokið um allt Vesturland, en haldnar eru þrjár svæðaskiptar lokahátíðar. Ár hvert hefst keppnin í nóvember, á degi íslenskrar tungu, og lýkur í mars með því að valdir eru bestu upplesarar 7. bekkjar í hverju byggðarlagi eða í umdæmi hverrar skólaskrifstofu. Keppninni er skipt í tvo hluta, ræktunarhluta og hátíðarhluta. Ræktunarhlutinn fer fram frá nóvember fram í febrúar og er þá lögð sérstök áhersla á vandaðan upplestur og framburð. Hátíðarhlutinn tekur síðan við og er hann það sem kalla mætti hina eiginlegu upplestrarkeppni. Þá eru lokahátíðir keppninnar haldnar í hverju héraði og koma þar fram fulltrúar skólanna og lesa texta og ljóð.

Á Akranesi fór lokahátíðin fram í Tónbergi, sal Tónlistarskólans á Akranesi, þar sem sex nemendur frá hvorum grunnskóla kepptu til úrslita. Sigurvegarar urðu þær Brynhildur Helga Viktorsdóttir fyrir hönd Grundaskóla og Dísa María Sigfúsdóttir úr Brekkubæjarskóla.

Nemendur úr Grunnskólanum í Borgarnesi, Grunnskóla Borgarfjarðar, Auðarskóla í Dölum, Laugagerðisskóla og Heiðarskóla leiddu saman hesta sína á lokahátíð sem fram fór í Hjálmakletti 23. mars sl. Nemendur úr Grunnskóla Borgarfjarðar, þau Ágúst Páll Þorsteinsson og Elísabet Egilsdóttir hrepptu fyrsta og annað sætið en þriðja sætið hlaut Vilhjálmur Ingi Ríkharðsson úr Grunnskólanum í Borgarnesi.

Loks var lokahátíðin á Snæfellsnesi haldin í Stykkishólmskirkju. Þar kepptu nemendur úr 7. bekkjum skólanna á Snæfellsnesi. Dagný Inga Magnúsdóttir úr Grunnskólanum í Stykkishólmi sigraði, í öðru sæti varð Símon Andri Sævarsson, einnig nemandi Grunnskólans í Stykkishólmi, og í þriðja sæti hafnaði Margrét Helga Guðmundsdóttir úr Grunnskóla Grundarfjarðar.

Dísa María Sigfúsdóttir og Brynhildur Helga Viktorsdóttir báru sigur úr býtum á lokahátíð Upplestrarkeppninnar á Akranesi. Ljósm. klj.

Verðlaunahafar hátíðarinnar sem haldin var í Hjálmakletti í síðustu viku. Frá vinstri: Vilhjálmur Ingi Ríkharðsson sem lenti í þriðja sæti, Ágúst Páll Þorsteinsson sigurvegari og Elísabet Egilsdóttir sem lenti í öðru sæti.

Stóru upplestrarkeppninni lokið á Vesturlandi