Snæfell heimsótti Stjörnuna þegar liðin mættust öðru sinni í undanúrslitaviðureign úrslitakeppni kvenna á laugardag. Skemmst er frá því að segja að Snæfellskonur sigruðu örugglega, 70-86 eftir að hafa haft yfirhöndina allan leikinn. Þær leið einvígið með tveimur sigrum gegn engum og eru komnar í vænlega stöðu fyrir þriðja leik liðanna sem fram fer í Stykkishólmi á miðvikudaginn.

Nokkuð jafnræði var með liðunum í upphafi leiks. Snæfell hafði þó undirtökin en Stjarnan var fylgdi fast á eftir. Þegar fyrsti leikhluti var rétt hálfnaður var staðan jöfn, 15-15. Eftir það skellti Snæfell í lás og Stjarnan skoraði ekki fleiri stig í leikhlutanum. Á meðan skoraði Snæfell átta og leiddi því 15-23 eftir upphafsfjórðunginn. Stjarnan minnkaði muninn lítillega í upphafi annars leikhluta en það dugði skammt. Snæfell kom forystu sinni fljótt upp í tveggja stafa tölu og hélt Stjörnunni í þægilegri fjarlægð allt til hálfleiks. Snæfell leiddi með ellefu stigum í hléinu, 35-46.

Með snörpum leikkafla snemma í síðari hálfleik náði Stjarnan að minnka forskot Snæfells í fjögur stig. En Íslandsmeistararnir voru ekki á því að hleypa heimaliðinu inn í leikinn. Snæfellskonur endurheimtu fyrra forskotið seint í þriðja leikhluta og settu síðan í fluggírinn. Áður en fjórðungurinn var úti voru þær komnar með 19 stiga forskot, 50-69 og með unninn leik í höndunum. Stjarnan reyndi að gera áhlaup eftir miðjan lokafjórðunginn en það var brotið á bak aftur. Þær minnkuðu muninn í tíu stig þegar þrjár mínútur lifðu leiks en nær komust þær ekki. Snæfell átti lokaorðið og varði lokamínútum leiksins í að innsigla 16 stiga sigur, 70-89.

Aaryn Ellenberg skoraði 31 stig og tók ellefu fráköst fyrir Snæfell. Bryndís Guðmundsdóttir var með 21 stig og Gunnhildur Gunnarsdóttir var með tíu stig og sex stoðsendingar.

Í liði Stjörnunnar var Danielle Rodriguez atkvæðamest með 33 stig, níu fráköst og níu stoðsendingar.

Sem fyrr segir leiðir Snæfell einvígið með tveimur sigrum gegn engum. Sigra þarf þrjá leiki til að komast áfram og Snæfell getur því tryggt sér farseðilinn í úrslitaviðureignina með sigri í næsta leik liðanna. Sá fer fram í Stykkishólmi miðvikudaginn 5. apríl næstkomandi.

Snæfell sigraði örugglega