Skallagrímur og Keflavík áttust við í undanúrslitum úrslitakeppni kvenna í körfuknattleik í gær. Leikið var í Borgarnesi. Skallagrímur leiddi einvígið með einum sigri gegn engum en Keflavík jafnaði metin í gær í miklum baráttuleik. Liðin hafa því unnið sinn útileikinn hvort og staðan er jöfn, 1-1.

Varnarleikur var aðalsmerki beggja liða í gær og leikurinn mikill baráttuleikur. Jafnt var á með liðunum í upphafi, Keflvíkingar leiddu fyrstu mínúturnar áður en Skallagrímur tók að sér að leiða skömmu síðar. Staðan var jöfn að upphafsfjórðungnum loknum 15-15. Leikurinn var í járnum í byrjun annars leikhluta en þá náði Keflavík afar góðum leikkafla og tíu stiga forskoti, 19-29. Skallagrímskonur svöruðu fyrir sig og minnkuðu muninn í fimm stig áður en flautað var til hálfleiks, 30-35 og leikurinn galopinn.

Baráttan og spennan sem einkennt hafði fyrri hálfleik hélt áfram í þeim síðari og bæði lið þurftu að hafa mikið fyrir hlutunum. Sérstaklega réru Skallagrímskonur þungan róður því þær skoruðu aðeins tvö stig fyrstu sex mínútur síðari hálfleiks. Á sama tíma tókst gestunum að skora níu og komast tólf stigum yfir. Þá tóku Skallagrímskonur smá rispu og minnkuðu muninn í sjö stig en komust ekki nær að sinni því Keflvíkingar áttu lokaorðið í þriðja leikhluta og leiddu með ellefu stigum að honum loknum, 41-52. Skallagrímskonur voru ákveðnar sóknarlega í fjórða leikhluta og minnkuðu muninn í sjö stig upphafi hans. Á sama tíma virtust þær hins vegar tapa einbeitingu í vörninni og Keflvíkingar áttu því ekki í vandræðum með að svara fyrir sig og auka forskot sitt að nýju. Gestirnir fundu ágætis takt sóknarlega og léku vel í vörninni. Skallagrímskonur náðu ekki að gera atlögu að forskotinu það sem eftir lifði leiks og Keflavík vann að lokum 15 stiga sigur, 59 -74.

Tavelyn Tillman var atkvæðamest leikmanna Skallagríms og í raun sú eina sem náði sér almennilega á strik í stigaskori. Hún lauk leik með 29 stig og tók þar að auki sjö fráköst. Aðrar komust ekki í tveggja stafa tölu í stigum skoruðum, en Sigrún Sjöfn Ámundadóttir lauk leik með níu stig, átta fráköst og sex stoðsendingar og Fanney Lind Thomas skoraði níu stig einnig.

Ariana Moorer setti upp myndarþrennu fyrir Keflvíkinga; 16 stig, 18 fráköst og ellefu stoðsendingar en Thelma Dís Ágústsdóttir var stigahæst gestanna með 20 stig.

Staðan í einvíginu er jöfn, 1-1 og með sigrinum í gær náði Keflavík heimaleikjaréttinum að nýju. Næsti leikur Skallagríms og Keflavíkur fer því fram suður með sjó að kvöldi fimmtudagsins 6. apríl næstkomandi.

Keflavík jafnaði metin í Borgarnesi