Skessuhorn greindi frá því síðasta haust þegar Dalamaðurinn Ásgeir Geirsson hampaði Íslandsmeistaratitlinum í lúftgítarleik á Íslandsmótinu sem haldið var í Reykjavík. Eins og lesendur geta eflaust gert sér í hugarlund þá fer keppni í lúftgítarleik þannig fram að keppendur spila á ímyndaðan gítar, svokallaðan lúftgítar eða loftgítar, á meðan lag að þeirra eigin vali ómar á bakvið. Sá sem þykir sína bestu tilþrifin við gítarleikinn ber sigur úr býtum. Ásgeir þótti sýna bestu tilþrifin og var í lok kvölds krýndur Íslandsmeistari. Tryggði hann sér í kjölfarið þátttökurétt á Evrópumótinu í lúftgítarleik sem fram fer í Finnlandi í lok maí. Þar ætlar Ásgeir sér stóra hluti. „Keppnin er hörð en ég tel mig engu að síður meðal tíu bestu lúftgítarleikara Evrópu. Sætaskipan efstu manna mun koma til með að ráðast mikið á dagsforminu og ég legg því upp úr að vera vel gíraður í keppnina,“ segir Ásgeir í samtali við Skessuhorn.

Til að fjármagna þátttöku í Evrópumótinu hefur Ásgeir brugðið á það ráð að bjóða til sölu lúftgítarinn fræga sem tryggði honum Íslandsmeistaratitilinn. „Ég kveð gripinn með nokkrum trega enda höfum við gengið í gegnum súrt og sætt saman. En einhvern veginn verður maður að reyna að kosta þátttöku í Evrópumótinu,“ segir Íslandsmeistarinn að lokum.

Áhugasömum er bent á að Ásgeir hyggst sýna gítarinn í verslun Samkaupa í Búðardal frá hádegi og eitthvað fram eftir degi í dag, laugardag, með það fyrir augum að finna gítarnum kaupanda og gott heimili. Auk þess verður hægt að fá að prófa gripinn. Verð er samkomulagsatriði.

Lúftgítarinn frægi sem Ásgeir lék á er hann tryggði sér Íslandsmeistaratitilinn. Verð er samkomulagsatriði en taskan fylgir þó ekki með í kaupunum.

Lúftgítar Íslandsmeistarans til sölu