Skallagrímur hafði sigur gegn Keflavík í fyrsta leik liðanna í undanúrslitaviðureigninni um Íslandsmeistaratitil kvenna í körfuknattleik. Leikið var í Keflavík í gærkvöldi. Eftir nokkuð jafnan leik sem heimakonur leiddu naumlega komust Skallagrímskonur yfir í lokafjórðungnum og stálu sigrinum eftir æsispennandi lokamínútur. Lokatölur urðu 68-70, Skallagrími í vil.

Gangur leiksins

Keflvíkingar höfðu heldur yfirhöndina í upphafsfjórðungnum þó ekki munaði miklu á liðunum. Að fyrsta leikhluta loknum var staðan 17-12. Keflvíkingar skoruðu fyrstu stig annars fjórðungs en um hann miðjan náðu Skallagrímskonur góðum kafla og minnkuðu muninn í tvö stig. Keflvíkingar svöruðu fyrir sig og juku forskotið að nýju en Borgnesingar áttu lokaorðið í fyrri hálfleik svo aðeins skildu fimm stig liðin að í hléinu. Þá var staðan 35-30 fyrir Keflavík.

Afar jafnt var á með liðunum framan af síðari hálfleik en Keflavík hafði heldur yfirhöndina eins og verið hafði fram til þess tíma. Skallagrímskonur minnkuðu muninn í tvö stig um miðjan þriðja leikhluta en því næst komst Keflavík sjö stigum yfir. Áður en leikhlutinn var úti hafði Skallagrímur minnkað muninn í þrjú stig, 53-50. Snemma í lokafjórðungnum komust Skallagrímskonur síðan yfir, í fyrsta sinn frá því á upphafsmínútum leiksins. Eftir það var leikurinn í járnum og mátti vart á milli sjá hvort liðið var sterkara. Keflavík minnkaði muninn í eitt stig seint í leiknum en Skallagrímsliðið skoraði næstu stig. Heimaliðið hafði möguleika á að jafna þegar fjórar sekúndur voru á klukkunni en höfðu ekki erindi sem erfiði. Skallagrímur sigraði með tveimur stigum, 68-72.

Bæði liðin mjög góð

Tavelyn Tillman skoraði 33 stig og tók sex fráköst fyrir Skallagrím. Sigrún Sjöfn Ámundadóttir kom henni næst með tólf stig og ellefu fráköst.

Tavelyn hafði orð á því í samtali við mbl.is eftir leikinn að Skallagrímsliðinu hefði ekki verið sýnd nægilegt virðing fyrir viðureignina af ýmsum spámönnum sem töldu víst að Keflavík myndi sigra viðureignina 3-0. Sjálf teldi hún Keflavíkurliðið mjög gott en það væri Skallagrímsliðið einnig og trúði því að framundan væri fimm leikja sería.

Með sigrinum tryggði Skallagrímur sér forystu í undanúrslitaviðureigninni. Jafnframt stálu þær heimaleikjaréttinum af Keflavíkurliðinu og því munu næstu tveir leikir liðanna fara fram í Borgarnesi. Sá fyrri verður leikinn á sunnudaginn, 2. apríl næstkomandi.

Skallagrímur stal heimaleikjaréttinum