Aðalfundur Kaupfélags Borgfirðinga fór fram í Borgarnesi síðastliðinn fimmtudag. Samkvæmt ársreikningi sem samþykktur var á fundinum nam hagnaður félagsins á síðasta ári um 17,2 milljónum króna en heildarvelta var tæpar 354 milljónir. Eiginfjárhlutfall samkvæmt efnahagsreikningi var 33,2%. Félagsmönnum fjölgaði um 71 frá 2015 og voru þeir 1606 um síðustu áramót. Þeim hefur fjölgað stöðugt undanfarin ár og voru sem dæmi 1297 í árslok 2010. Mest hefur fjölgunin orðið í Breiðafjarðardeild sem stofnuð var 2012 en hún spannar norðanvert Snæfellsnes, Dali og Barðaströnd að Kjálkafirði. Kaupfélagsmenn við Breiðafjörð eru nú 149 en voru 28 árið 2012.

Kaupfélagið er eitt elsta fyrirtæki Vesturlands og varð 113 ára í janúar. Meginstarfsemi þess er rekstur búrekstrardeildar í Borgarnesi. Félagið rekur einnig fasteignir í gegnum dótturfyrirtæki sitt Borgarland og þá á það verðbréfaeignir. Sú stærsta er 13% hlutur í Samkaupum hf. sem bókfærður er á tæpar 400 milljónir króna. Arður af verðbréfum félagsins nam 38,1 milljón króna á síðasta ári.

Fram kom í máli Guðsteins Einarssonar kaupfélagsstjóra á fundinum að meðal helstu verkefna framundan væri að stækka búrekstrardeild félagsins í Borgarnesi en núverandi húsnæði væri farið að þrengja að rekstrinum. Þá er unnið að undirbúningi á lóð Borgarlands við Digranesgötu í Borgarnesi en þar áformað að reisa stórt húsnæði með verslun, þjónustu eða hóteli.

Sveinn Hallgrímsson heiðraður

Á aðalfundinum var stjórn Kaupfélagsins endurkjörin en stjórnarformaður er Guðrún Sigurjónsdóttir á Glitstöðum í Norðurárdal. Þá var Sveinn Hallgrímsson fyrrverandi skólastjóri Bændaskólans á Hvanneyri heiðraður á fundinum. Sveinn var stjórnarformaður Kaupfélagsins upp úr aldamótum og kom fram í ræðu Guðsteins kaupfélagsstjóra að hann hafi leitt félagið á þeim tíma til farsælla ákvarðana.

Kaupfélagið hagnaðist um 17 milljónir